日本車站驚現大大張證件相變另類宣傳 大學生無奈表示：寄錯嘢

撰文：PC | 圖片來源：Twitter @OKD_OOPS

原為於日本車站登社團招募新社員廣告 誤寄證件相

呢位咁大意嘅日本網民係嚟自早稻田大學兼東北學生稻門會幹事長，早前為咗自己學校嘅社團招募新社員而登廣告，但就唔小心將廣告內容同自己嘅證件相調亂咗，將自己嘅證件相寄咗去廣告印刷廠，直到車站將廣告出街先發現廣告變咗自己個樣！

意外得到另類宣傳

網民發現咗之後，就將自己嘅「瘀事」於上自己Twitter，點知唔洗一日已經有24萬讚好同近9萬個轉載，意外得到另類宣傳效果。而佢都即刻順勢借機宣傳各個社團活動，仲話佢嘅「證件相廣告」會喺日本早稻田站刊登到4月30日先會落架。

日本網民大讚有創意

大量日本網民唔單止冇笑到呢位幹事長，反而仲大讚佢好有創意，打破咗廣告傳統既定嘅框框，仲利用埋網路快速散播嘅特點，而家嘅宣傳效果仲好過平時㖭呀！不過另外都有網民話，正常印刷廠都會先同客人確認返廣告嘅內容係咪啱，懷疑呢個係「被意外」事件！不過都大讚幹事長大膽嘅諗法呀！