日本節目實測！零整容零節食 一招令你50日後宅女變靚女｜網絡熱話

編輯：SY（原文：膠Hub）｜資料來源：《50日間で女性の顔は変わるのか！？マツコが観察！》

日本節目實測稱讚宅女50日即變靚女

《50天變美計劃》（50日間で女性の顔は変わるのか！？マツコが観察！）節目組搵咗大學生京香做實驗，實驗對象喺唔使整容唔健身下，50日內連續被讚，睇下50日後係咪真係會變靚女。唔通呢啲就係「因有自信，所以美麗」？

大學生京香係一名參加漫畫研究會嘅宅女，成日都留喺屋企唔出街，佢唔係好識同人溝通。中學時候仲因為被人取笑自己嘅鼻毛，所以一直戴口罩。

京香話，自己唔敢同男仔講嘢，希望自己有返自信，所以節目組幫佢安排意大利文班，喺過程中外藉靚仔老師會不斷讚美佢，令佢重拾自信。喺實驗過程中，外藉靚仔老師日日讚佢，令京香越來越注重自己嘅形象同儀容。

京香開始學習化妝技巧，仲會買一啲時裝雜誌，認真去學習如何打扮。仲特意去買隱形眼鏡同一個新嘅眼鏡，改變自己「宅女」嘅形象。為咗見外藉老師，第一次著上淑女長裙，令觀眾眼前一亮。

50日後變得更自信更靚

喺呢短短50日，京香嘅外表同心態上都慢慢有改變，好多人都感受到佢比以前自信。可見一個人嘅讚美的確會由潛意識慢慢改變你。但係，就算冇其他人嘅稱讚，自己對自己嘅肯定都非常重要！