港男不滿被抄牌出奇招交罰款癱瘓郵局報復！ 網民狠批幼稚：損人不利己

港男被抄牌意圖癱瘓郵局 網民懷疑事主想報復

被抄牌的話，一般的定額罰款通知書都可以在銀行自動櫃員機、網上銀行、電話理財、繳費靈、郵寄繳費、郵政局等地方繳費，市民可以自行選擇。不過，最近就有人懷疑因為想報復被抄牌而做出想癱瘓郵局的事情。

被抄牌的港男在郵局繳費時於群組「全港違例抄牌提示區」上發帖，貼出了一張手持塑膠袋的相片，袋中見到有兩張牛肉乾和大量散銀。樓主表示:「我違例泊車係應該被罰，所以去交罰款，郵局每張（牛肉乾）最多收$100蚊散銀，2蚊毫子。交兩張即時癱瘓咗郵局，咁多位排隊街坊，對唔住。」

網民怒插事主行為自私！

樓主有意癱瘓郵局，立即引起大批網民反感。交兩張牛肉乾就要癱瘓郵局，狠批樓主行為極幼稚，更有人指：「損人不利己」、「做呢啲無聊嘢仲要放上網以為好有型！好心啦！」、「on X真係可以無極限」。

事主再上水回應惡評！

樓主之後竟然「上水」，並回應網民留言，更指自己行為跟足指示，而且又冇犯法，除咗鬧他，根本沒有人可以阻到他，行為極無恥。「我只係去承擔違泊嘅法律責任，跟足法律，又冇超過額定硬幣」、「呢個世界人阻我，我阻人有咩問題，去超市排隊前面個數毫子。去七仔買枝水，遇著有人用散銀交幾張單，仲要拎個電話出嚟叫個職員幫佢唔知掃啲乜嘢code。我遇到嘅時候，都唔會學似你班友咁個個道德正義上晒身咁鬧人。跟足指示去做又冇犯法，有咩唔妥……小弟時間多最鍾意做不合作活動，咁你地除咗鬧我又可以做到啲乜？」

網民見樓主仍然歪理連篇，於是再次狂轟樓主：「搵錯人報仇」、「嘥你自己時間咋嘛」、「人哋郵局個職員慢慢數住錢都有錢收，等佢企兩個鐘」。最後，由於網民大軍狂轟樓主，於是他將帖子的留言區關閉，沒有再回覆網民留言。