打工仔熱心為跌倒伯伯報警 老細：「公司冇呢類指引！都係當你遲到！」｜網絡熱話
廣告
打工仔最怕返工遲到，但老套問一句，喺街上見到有婆婆跌親，你哋會選擇伸出援手定係視而不見呢？有網民喺Facebook群組上載一張相片，相中見到快餐店入面有人側身瞓喺地上，身邊有幾個途人，樓主表示為幫跌倒嘅伯伯，公司竟然無視解釋當遲到，引嚟一眾網民留言表示：「喺香港做打工仔真係好慘！」
撰文：Evita｜圖片：新傳媒圖片庫、Tai Po大埔、網上圖片
熱心打工仔為跌倒伯伯報警
樓主表示返工前喺快餐店食早餐期間，見到一位伯伯失平衡跌倒，頭部嚴重出血。樓主主動報警求助，當時亦有兩位途人同一位後到嘅商場保安到場協助。警察到場後叫佢哋留低協助調查，直到救護員到場。
打工仔助人 卻被當遲到
此時樓主向公司交代情況，再問公司喺呢種情況下點樣處理遲到問題，竟然畀同事反問：「點解係你報警唔係職員報呢？都係當你遲到囉，公司無呢類情況指引。」
樓主又話，有份幫手嘅女士事後不斷抱怨當時點樣叫其他人報警都無人郁，包括快餐店職員，上班族食完即閃，街坊就只識企喺旁邊食花生。
樓主感嘆社會冷漠
樓主感嘆公司同途人嘅反應令人覺得婉惜，指：「香港人『返工第一』呢種特質非一朝練成，而且促成社會嘅冷漠程度。」
帖文得到2百幾個留言回應，有網民大讚樓主救死扶傷，有網民大鬧快餐店職員唔幫手，又有人同樓主一樣慨嘆社會已經扭曲。
你又會點做呢？
有網民藉住呢件事分享過往經歷，表示社會上真係有救急扶危嘅人，亦有人置身事外。如果今次係你遇到呢件事，你又會點做呢？救人定係返工重要啲，就好似阿媽同女朋友一齊跌落海救邊個先，問題長期發生。
撰文：Evita｜圖片：新傳媒圖片庫、Tai Po大埔、網上圖片
