打尖被地勤勸排隊 港女發脾氣唔上機兼要求地勤道歉

撰文：Evita | 圖片：劇照、Facebook截圖

港女打尖被地勤勸排隊

有地勤（下稱A同事）投稿至Facebook專頁，分享自己有一日喺前公司返工時，客人正在排隊登機，當條隊愈嚟愈少客人，就會逐少拆拉帶柱，唔使客人兜太遠先行到過嚟。

A同事就分享：「突然間有位香港女士，喺中間自行拆開我哋條queue攝咗入去。」

A同事又話，呢位港女攝正喺一對夫婦中間，後面嘅先生表現得一臉無奈，於是A同事就示意港女排返去後面。

A同事：「小姐，唔好意思，麻煩喺後面排一排隊。」

小姐：「吓！你無嘢啊！你邊隻眼見到我無排隊？」

A同事：「小姐，你望下後面其實都仲有幾位客人。」

小姐：「你咩態度？我而家就唔排隊唔上機。」

隨後港女坐埋一邊，當所有客人都上晒機嘅時候，有B同事叫佢上機，點知港女就大大聲話A同事話佢唔排隊，指自己心靈受創，並要求A同事鄭重道歉，要講「對唔住」同「唔好意思」。

而B同事就話：「我諗係小誤會嚟嘅，嗱，真係唔好意思，咁我邀請你上機。」

小姐：「我要佢同我講，唔係您，佢唔同我道歉我唔上機。」

之後A同事就話所有客人都上嗮機，同時經理就話可以搵定呢位小姐嘅行李，準備卸載。不過小姐依然要求A同事講對唔住，而A同事意志堅定，認為自己無做錯所以唔會道歉。

小姐又使出「投訴之都」嘅本領，話要投訴A同事，不過A同事就一於企硬，除咗主動提供職員編號外，仲話搵同事幫佢處理埋其他手續，最後港女死死哋氣去閘口上機。

去旅行都係求開心，又何必搞到咁呢？仲要成班乘客等佢一個……有網民大讚地勤態度企硬好啱，話唔畀啲教訓個女人都唔得！

如果你係地勤，你又會點做呢？