師奶打尖被鬧反發爛渣！網民熱議：排到一半走咗去仲叫排隊？｜網絡熱話
廣告
排排下隊見到人打尖你會點做？平時出街食飯、買嘢又或者㩒錢時見到多人，相信大家都會好守規矩咁排隊。有網民投稿至「西客之道HIspitality Secret」專頁，指排隊等車時有港媽帶同仔仔打尖，事後仲要發爛渣，究竟係咩事呢？
撰文：Evita | 圖片：新傳媒圖片庫、Facebook截圖、KMB九巴專頁｜資料來源：西客之道HIspitality Secret
港媽離隊十分鐘返轉頭打尖
有網民投稿至西客之道，分享自己喺巴士總站等巴士時嘅經歷。
一個香港師奶同個四五歲嘅仔排我後面，個仔彈嚟彈去撞到後面嘅人，呀（啊）媽都無理。然後佢地排排下就走開咗，過咗十分鐘之後返嚟插隊插咗係我前面。
網民指當時開聲同港媽講：「你係咪排隊㗎？隊尾喺後面喎！」
港媽回應：「咩啊！我頭先排呢到㗎！咩規矩啊⋯⋯」
網民又話之後港媽排喺佢後面，個仔依然繼續周圍踢，排喺後面嘅人就畀個港媽嚇到呆晒。
網民指上車之後港媽極大聲講電話，話自己畀衰人恰，搭巴士打尖畀人鬧，應該行路先啱。
又對仔仔講：「下次排隊要小心啊，會畀無禮貌嘅衰人話㗎！」
網民投稿時不禁問：「其實排排下隊走開十分鐘仲叫排隊咩？咁樣嘅人教小朋友真係好恐佈。」
網民大讚 被打尖挺身而出
有其他網友留言就話都有遇過等車被打尖嘅經歷，亦有人話見到呢啲人一定要大大聲鬧佢。
亦有網民話其實係樓主唔啱，認真母子係有可能去咗廁所再返嚟。如果大家遇到呢啲問題，又會點做呢？
撰文：Evita | 圖片：新傳媒圖片庫、Facebook截圖、KMB九巴專頁｜資料來源：西客之道HIspitality Secret
