戴Rolex、Omega就係炫富？ 戴唔戴手錶成網友討論熱話 | 網絡熱話
廣告
基本上想睇時間，望一望電話便可，咁戴手錶其實仲有冇用？於是乎戴唔戴手錶成為現今唔少人嘅疑惑，最近台灣有好多網友喺討論區討論戴唔戴手錶呢個問題，唔少人覺得今時今日啲人仲戴錶，其實係想炫富，例如戴Rolex、Omega根本係為Show Off，大家又覺得以下一眾網友觀點合唔合理？
撰文：Easy 丨 圖片來源：Rolex、TVB、Apple、劇照 ｜編輯：Bonita | 原文刊於：新Monday
戴Rolex、Omega就係炫富？ 戴唔戴手錶成網友討論熱話 | 網絡熱話
反對戴手錶派別：
討論區上，唔少網友話今時今日手錶已經冇乜用途，例如唔少人話「有手機就唔戴手錶」、「有料嘅人睇談吐就得，幾百萬嘅錶，如戴Rolex、Omega根本係為炫富」、「唔戴啦，成日撞到隻錶，之次隻錶買咗冇耐跌咗落馬桶」、「寧願買部車」，反對戴手錶派別網友似乎已好習慣以電話睇時間嘅生活，戴手錶反而係一種負擔。
支持戴手錶派別：
不過喺討論區上亦有唔少人支持繼續戴手錶，唔少錶友覺得比起拎手機出來睇時間，點都唔會方便過睇手腕上嘅手錶，更提出唔少意見，例如「難道每個場合都方便睇手機?」、「手錶係一種配件，係男人裝扮時好需要嘅配件」、「你地唔覺得每次睇時間要拎手機出嚟好麻煩咩？」、「看得懂手錶嘅人自然就會懂，看不懂就係你唔識，反正本來就係戴俾知音人睇」。以上觀點，好似又幾證明到手錶確實用依然有好多用途。
綜括嚟講，兩個派別各有支持者，手錶喺唔少人心目中已經唔單止係睇時間，根本早已係配飾嘅一環，穿搭有時係需要一隻手錶作畫龍點睛；甚至象徵社會地位。點都好，鹹魚青菜，各有所好，其實戴唔戴手錶真係因人而異，大家河水不犯井水便好。
