行動自如客人要求買戲院輪椅位：「我有自備櫈！」| 網絡熱話

撰文：Evita | 圖片：西客之道Hispitality Secret、新傳媒圖片庫

行動自如客人要求買戲院輪椅位

日前有戲院職員投稿至Facebook專頁，表示每間戲院都會有個位將張櫈拆走，讓輪椅人士可以直接將架輪椅駛入空位。而上月有行動自如嘅客人要求買輪椅位，更表示自己有自備櫈。

職員：「唔係客人自唔自備嘅問題，係輪椅位我地唔賣得畀一般客㗎，如果我賣左畀你，其實到時摵飛同事都係會截住唔畀你入場。」

客人：「點解唔畀啊？我有自備點解唔畀啊？我上次都得啦點解你今次唔賣畀我啊？」

然後職員表示因為《消防條例》係唔可以加櫈，亦唔確保「自備櫈」係防火物料製，繼續拒絕賣飛畀客人。

客人：「唔好同我講消防條例，你唔賣畀我就叫經理出嚟見我，我就想問點解我上次得今次唔得。」

職員：「唔好意思啊，經理出咗去食飯，或者先生你轉頭再返嚟？」

客人繼續咬住唔放，更問「點解要我轉頭返嚟」，亦指責係職員唔肯賣飛。然而職員又再次講《消防條例》，不過就被客人截停：「我話得就得啦，賣你就賣啦咁多嘢講。」

之後職員賣飛畀客人，亦重申多次如果要退飛或唔畀入場係唔會負責。去到開場前15分鐘，得知事件嘅經理要求客人退飛。

客人：「我識呢到附近食肆經理，佢哋應承咗轉頭借張櫈畀我入去坐。你唔好同我講消防條例啦，我仲熟過你呀！」

最後，職員表示經理屈服，照畀個客入場。不過最令職員唔開心嘅，其實係喺後面排緊隊嘅人完全無人出聲幫口。而其他網民則大鬧經理畀客人入場係最失敗，但亦有人認為投稿者本身已經唔應該賣飛畀佢。