惜食堂《豐膳罐愛心》展覽 3萬個罐頭組裝巨型裝置展品打卡兼傳遞愛！

Nov 11 2023

想打卡兼有意義？咁就啱啦！惜食堂由即日起至11月16日會喺銅鑼灣希慎廣場1樓中庭及利舞臺廣場地下展出Canstruction®️Hong Kong《豐膳罐愛心》罐頭藝術裝置展覽，透過舉辦以罐頭堆砌成又靚又有創意嘅罐頭作品展覽，喚起公眾關注基層人士面對飢餓問題，為社會有需要人士送上食物帶來溫飽。

今年惜食堂《豐膳罐愛心》罐頭藝術裝置展覽有滙豐銀行慈善基金全力支持，同埋希慎興業有限公司贊助場地，透過展覽傳達「一罐一膳心，將愛與關懷送給社會上有需要人士」嘅理念。

除咗實體展覽外，仲舉辦咗校際網上比賽，今年共有17間學校參加，由師生捐出罐頭食品，有部份學校更喺校園內用罐頭砌出好有創意嘅作品，再俾大家投票或捐款支持自己最喜愛嘅罐頭裝置，活動完結後，所有罐頭食品將捐予惜食堂協助製作飯餐或轉贈有需要人士，好有意義！

惜食堂今年由多個唔同界別組成共4個參加隊伍，另設有學生組別，展覽前動用咗逾100人喺12小時內運用近3 萬罐罐頭食品，一齊製作及組裝成巨型作品展覽！ — 今年由多個唔同界別組成共4個參加隊伍，另設有學生組別，展覽前動用咗逾100人喺12小時內運用近3 萬罐罐頭食品，一齊製作及組裝成巨型作品展覽！（圖片來源：NMG）

惜食堂滙豐銀行慈善基金作品：暖粒粒電飯煲展覽位置 : 希慎廣場1樓中庭） — 滙豐銀行慈善基金作品：暖粒粒電飯煲（展覽位置 : 希慎廣場1樓中庭）（圖片來源：NMG）

惜食堂 UCP Group作品：愛心之樹展覽位置 : 希慎廣場1樓中庭） — UCP Group作品：愛心之樹（展覽位置 : 希慎廣場1樓中庭）（圖片來源：NMG）

惜食堂 Giving Love作品：滙愛慈航展覽位置 : 希慎廣場1樓中庭） — Giving Love作品：滙愛慈航（展覽位置 : 希慎廣場1樓中庭）（圖片來源：NMG）

惜食堂 Campbell — Campbell’s x 惜食堂作品：「鍋」心暖意（展覽位置 :利舞臺廣場地下）（圖片來源：NMG）

《豐膳罐愛心》罐頭藝術裝置展覽開幕禮除咗邀請車婉婉任大會司儀，仲有惜食堂主席梁錦松先生、滙豐香港區行政總裁林慧虹女士、希慎興業有限公司主席利蘊蓮女士聯同歌手林奕匡一齊舉行咗一個簡單而隆重嘅開幕儀式，四位主禮嘉賓仲利用善心罐頭拼出巨型愛心展品，寓意集合各界的關愛及善心，令有需要人士受惠。

另外，惜食堂更會喺12月首次舉辦一個名廚罐頭食品愛心宴，集合六名知名廚師，包括國際廚藝大師陳國強、香港菇菌宴宗師陳少麒、香港 JW 萬豪酒店米芝蓮一星中菜大廚鄧家濠、瑞吉酒店米芝蓮二星行政中菜總廚洪志光、鍾菜館集團總廚王慶團以及法國餐廳主理人沈依紅，而稻香集團更會借出「稻鄉飲食文化博物館」作為愛心宴場地，為惜食堂服務使用者及參與活動人士以罐頭做出美食，大膽嘗試令人期待！