經典快餐店回顧！童年回憶一一結業 只剩這間僅留一分店｜網絡熱話
撰文：新假期編輯部｜圖片：新假期資料庫、網上圖片
童年回憶！ 我們懷念的快餐店
有時有啲嘢真係失去先懂得珍惜，就好似以下呢幾間經令人念念不忘嘅快餐店咁。
1.Freshness Burger
身為日式漢堡連鎖店嘅Freshness Burger，除咗有多款特式和式漢堡外，亦有售賣和式三文治、沙律同其他日式甜品。而店鋪裝潢亦參照返日本店嘅裝潢，以招牌墨綠色為主色，有別於美式漢堡店。可惜，曾於零七年起於香港設八間分店嘅Freshness Burger於早年已全面撤出香港。嗚阿，突然之間好想食返佢個招牌豆腐漢堡阿！
2.哈迪斯 Hardee’s
美式快餐連鎖店哈迪斯於九零年代開始進駐香港，曾於香港設25間分店，但同樣因經營不善問題而導致零六年底撒出香港，亦即係撤出亞太區市場。不少九十後都視佢為集體回憶，除咗多番受到網民「悼念」外，亦於去年的愚人節受網民惡搞，於網上流傳哈迪斯於即年回歸嘅消息！哈迪斯經典嘅西部牛仔飯（肉醬飯）、兩件雞配汽水嘅套餐一定喚起返唔少人嘅回憶！
3. Wendy’s
Wendy’s亦曾兩度進軍香港。首次於八十年代就進駐香港，憑住可愛嘅孖妹商標而名為「得意妹」，撤出後於90年代初轉以Wendy’s名重返香港市場，獨特嘅方形漢堡牛肉同原個焗薯受到香港人熱捧，曾設立十多間分店，不過，於2003年又再一次撤出香港。
4. 出奇老鼠
講完九十後嘅集體回憶，又點少得七、八十後呢？「薄餅樂園開心地，出奇老鼠錫晒你！」一講起呢句，唔少八十後即刻不自覺認頭：「我有去玩過呀！」，呢句來自美國嘅兒童樂園加快餐店-出奇老鼠嘅經典廣告口號，當時可謂無人不曉！於八十年代初於香港開業，主要經營室內遊樂場同快餐薄餅店，仲設有幾間分店，可以話係有得食、有得玩，簡直係小朋友嘅天堂呀！可惜，佢於89年就結業，撒出香港。
5. 唯一僅存快餐店 Burger King
來自美國佛羅里達州嘅Burger King曾兩度登陸香港，首次登陸香港於1980年，當時佢仲用緊直譯名「堡加敬」做商標，可怕受到經濟影響同麥當奴等速食店嘅打擊下就結束咗僅維持十年嘅業務，之後再戰香港，全盛時期多達20多間分店，但由於經營問題，於5年前全部分店結業，雖然山頂店因為由另一特許經營商營運嘅關係而不受影響，但以後想喺市區食平、靚、正嘅漢堡餐又少一個選擇啦！
當年嘅「廿蚊華堡餐」都非常受歡迎，長達5吋嘅牛肉漢堡配唔同口味，當時更因反應熱烈而延期一日，當時嘅員工更喺Facebook大呻呢個三日嘅推廣優惠簡直係「做死人」，可見受歡迎程度！
Burger King嘅粗切薯條的確勾起哂我對佢嘅懷念啊，薯條嘅質感與脆度配合恰好，簡直可以打倒哂眾多快餐店而成為薯條之霸！
