「平成空氣」罐頭最後封存 限售600罐 網民有樣學樣

撰文：PC | 圖片來源：Hero Production官方網站

與年號平成同名 於當地製出罐頭

位於岐阜縣關市嘅平成(Henari）地區，因為同日本年號「平成」(Heisei）漢字相同而受到注目，當地更加專登起咗「年號橋」以作紀念。而喺改年號之前，佢哋出咗一款罐頭，而入面就係裝嘅係空氣！仲限量600個發售，每個賣大約港幣$75!

「平成空氣」加上5日圓 寓意結緣

喺平成川一帶，當地居民喺日前就喺「年號橋」附近，喺空中揮動空罐頭，將空氣「裝入」罐入面，然後再放上一個5日圓硬幣，寓意「可以在新的時代都能夠結緣」（緣同5圓嘅日文發音相同）。

作為平成最後紀念

罐入面嘅空氣冇任何特殊香味，亦冇任何特別功效成份。而負責「平成空氣」商品企劃嘅Heso Production就表示：「如果淨係將空氣放入罐頭入面賣，好多人都應該會覺得好好笑，但如果有人將打拼過嘅平成時代嘅空氣留低，就算罐頭賣剩都可以保存到未來，作為平成最後嘅紀念。」

傳媒爭相探訪 市民感稀奇

「平成的空氣」已經喺22號開賣，有唔少日本傳媒都到場採訪，有比較年老嘅客人都覺得「平成空氣罐頭」好稀奇，覺得係一個好好嘅回憶，會好好珍惜。不過同時亦有小朋友拎起罐頭都話好輕呀！

網民笑言可自製「平成空氣」產品

日本網民眼見空氣都可以賺錢，唔少網民都話要有樣學樣，例如將空水樽「裝入」空氣，然後扭實將空氣「封印」，笑言自己都可以製作大量平成空氣樽，一樣可以拎出嚟賣！亦有買咗「平成空氣」嘅日本就猶豫「究竟要幾時打開。」