【工廈食玩王】$180 葵芳做奧運箭神 ！潮整紫薯栗蓉月餅

Sep 18 2015

工廈都有得體驗做奧運射箭手？你無睇錯！仲可以輕易射到高分！呢個好玩嘅地方就隱藏咗喺葵芳安福工業大廈，地鐵站行過去只有五分鐘路程！大廈內仲有得參加潮式紫薯栗蓉月餅班同卡通燈籠班！有動有靜，今個周末又有好節目喇！

$180 學做奧運箭神

呢間射箭教室，俾$180就可以體驗做奧運射箭選手嘅樂趣！星期六同日都有得玩，學員會配備奧運射箭項目使用嘅反曲弓一把，仲有箭用箭袋，Full gear上陣，課程約1.5小時，4-8人上堂，喺呢1.5小時入面，第一階段先係學習基本安全知識，第二階段係技巧練習，導師會從旁指導，糾正學員嘅姿勢，第三階段就係比賽，亦係最好玩嘅部份，可以同其他學員鬥射得高分！提一提大家，由於射箭運動始終有一定危險性，所以參加者一定要12歲以上！

記者試玩：好易拎高分！

記者Ducky試玩，射咗3枝箭，第一支中10分，其餘兩支都係9分！教練都話成績唔錯，不過當距離由5米增加到去7米，Ducky就即刻失準，仲射出界添！原來因為玩得耐，手臂肌肉攰會影響準繩度，休息一陣先再玩，命中率較大機會高返！仲有小貼士俾大家，就係站姿一定要夠端正，重心盡量唔好有偏差，射出去嘅箭會準啲。

致勝射箭
地址：葵芳葵豐街41號安福工業大廈8樓E及F室（顯示地圖）
電話：5307 3328
網頁：http://www.winning-archery.com.hk/course/fd

潮整紫薯栗蓉月餅！

9樓呢間甜品教室，有得學整潮州月餅，外層係圈圈狀嘅酥皮，餡料可以揀人氣嘅紫薯栗子蓉，又或者係較為傳統芋泥，學費$340，一次可以整到8個，平日上堂就4-6人一班，星期六、日就6-12人一班。另外仲可以學近期好hit嘅韓式唧花蛋糕，課程用嘅唧花材料係鮮忌廉，比一般使用嘅牛油忌廉食落無咁油膩，有分初階班同中階班，初階班嘅唧花（6吋蛋糕）會佔蛋糕一半左右位置，時間要3至4小時，而中階班（7吋蛋糕）就會成個蛋糕圍邊唧晒，時間要5至6小時，。如果想玩唧花，但又想平少少試下先，仲有個小花盆蛋糕班，學費$300，可以整到4個迷你花盆海綿蛋糕。

Joycake
地址：葵芳葵豐街41-45號安福工業大廈9字樓H室（顯示地圖）
電話：2439 9208
網頁：http://www.joycake.com.hk

$90 親子燈籠製作班

再上多幾層，15樓有個親子Party room，9月頭開張，設施都好新，仲設有育嬰室同獨立洗手間，方便媽咪。而近期有個親子燈籠製作班，$90可以一個大人同一個小朋友齊齊學整燈籠，如果兩個大人同一個小朋友參加，就$120，玩1.5小時。其實都幾抵玩，因為單係燈籠款已經有10款揀，同埋頭45分鐘係學整燈籠，之後45分鐘就可以使用Party room內嘅設施，內有小型波波池、吹氣城堡等。負責人話中秋節正日都會開班，即日整完個燈籠，夜晚就拎去玩，小朋友實開心晒喇。

Surprise Party 十派
地址：葵涌葵豐街41-45號安福工業大廈15樓E至F室（顯示地圖）
電話：9138 5799
Facebook Page：https://www.facebook.com/surprise.party4u

玩到餓，食乜好？安福工業大廈附近都係得茶餐廳，但其實行出少少，約5分鐘路程，就會到葵青劇院同新都會廣場，兩邊都係美食集中地，有幾好hea嘅牧羊少年咖啡茶酒館，亦都有海南風味三層tea set，俾大家食飽飽。

牧羊少年邪惡芝士肉醬薯條

以旅遊為題，走文青路線嘅牧羊少年咖啡．茶．酒館，門口成個蒙古包咁，夠晒異國風，入面賣嘅食物都係多國菜，包括美式芝士肉醬薯條，熱熔芝士舖滿面，仲有牛肉肉醬，邪惡度爆燈！仲有和風燒汁鰻魚PIZZA，面層有郁郁下嘅木魚絲，入面有燒汁饅魚肉，鍾意fusion菜嘅朋友都可以試下！

牧羊少年咖啡．茶．酒館
地址：葵芳興寧路12號葵青劇院地下2號舖（顯示地圖）
電話：2439 5669
營業時間：8am-11pm

南洋Afternoon Tea 每人唔使$100

喺新都會廣場嘅少爺18，主打東南亞fusion菜，餐廳內有個三層架tea set，有別於一般英式下午茶，食物主要係東南亞菜式，鹹點包括雞肉沙嗲串、印度咖哩角同新加坡鮮蝦春卷。而甜點則有一口斑蘭咖央多士、椰香脆香蕉同榴槤朱古力餅，配咖啡或茶。一個tea set 兩個人食都係$138，計埋加一每人唔使$100，又有得坐下，算合理。亦有傳統馬拉燒春雞，以參巴醬、黃薑、香茅、乾葱等醃過雞嚟燒，食落雞肉滲有濃郁香料味，酸中帶辣，香濃惹味。新加坡香辣蝦意粉則以番茄跟辣椒做醬，食落有辛勁。

少爺18
地址：葵芳興芳路223號新都會廣場4樓410-412號（顯示地圖）
電話：2156 2228
營業時間：11:30am-11pm