山坡曬衫搵命搏 爬幾層樓險象環生
廣告
如果為咗曬衫，唔知大家可以去到幾盡呢？近日就有節目發現有居民冒著生命危險，踩住鐵絲網，仲爬上四、五樓層樓咁高嘅山坡曬衫。場面真係非常驚險，仲睇到一班街坊心驚驚。而近日天氣開始晴朗轉熱，有充足陽光，所以都有唔少人開始將冬天嘅棉被同衣物一次過拎晒出嚟曬太陽，除蟎後就方便保存啦。但係為咗曬衫爬上山坡，山坡仲要凸凹不平，一唔小心差錯腳隨時重傷，得不償失！
撰文：GW｜來源： 相關機構
工地附近曬衫 曬完仲污糟咗？
而其實都有唔少網民同居民指出附近有工程進行緊，距離曬衫山坡只有約50米距離。工程揚起嘅塵土隨時將洗完嘅衫變返污糟。不過似乎班街坊都少理，只要件衫乾到就得。
居民都表示其實如果太陽曬唔到個單位，香港天氣又潮濕，結果就係成屋都焗到好潮濕，仲可能搞到發霉，件衫又乾唔到。而屋邨配套又唔足夠，咁大個屋邨只係得一兩個泊車位咁大嘅地方畀人曬衫。
欣明苑人情味濃 開放籃球場任曬唔嬲
有網民發現將軍澳欣明苑掛滿各式棉被衣服，已經被「曬衫軍」攻佔。唔通居民為咗曬衫懶理規矩，霸佔球場？實情並唔係咁！網民指出，屋苑管理處每年喺五月左右都會開放籃球場畀居民任曬，原因係「將軍澳潮濕，好多屋邨業主立案法團5至7月搞曬被，除蟎，方便居民夏天收納。環保，德政！」
唔少網民大讚屋苑措施利民：「居屋一向有指定日子開放球場比住戶曬被曬嘢的，仲有保安幫手睇住唔比外人入嚟曬被，又唔怕比人偷嘢」、「曬被係好過掠乾，正好多架！」、「咁如果個場無人用，環保晒下衫被都好嘅。」
