屯門公園自娛區或將「壽終正寢」 區議會全票通過促取消
廣告
屯門公園多年以來的嘈音問題備受關注，大媽大聲播歌、跳艷舞及非法收取打賞的行為更是讓屯門居民怨聲載道。最近網民更在7月6日發起「光復屯門公園」行動，促政府關注事件。屯門區議會今日開會時就建議取消屯公自娛區，最終沒有議員反對，建議被一致通過，自娛區及艷舞大媽將「壽終正寢」。
撰文：GW｜資料來源：屯門區議會、屯門公園衛生關注組
街坊成功爭取 屯門公園自娛區壽終正寢
主辦「光復屯門公園」遊行嘅屯門公園衛生關注組於7月9日中午喺Facebook專頁宣佈：「屯門街坊成功爭取自娛區壽終正寢」，屯門區議會今早不消幾分鐘就一致通過取消屯門公園內嘅「自娛區」，煩人嘅「大媽噪音」有望被取締，困擾屯門居民十多年嘅惡夢終於有機會得到解決！不過「關注組」就話：「噪音滋擾街坊十年，原來幾分鐘就解決到。咁請問呢十年嚟，區議會到底做緊咩？」多得一班網民同屯門街坊用遊行去「嘈」醒一眾區議員，令佢哋終於去關注屯門人真正嘅聲音及需要！
區議會僅促取消自娛區 執法與否還看康文署
正當全港18區網民爭相向屯門人恭喜「爭取成功」時，就有心水清嘅網民就提醒大家，今次區議會通過議案，只係要求康文署加強執法，真正當握執行大權的是康文署，康文署屯門區康樂事務經理譚燕婷就喺在會議上話，當年喺公園劃出「自娛區」，目的係想減低園內「曲藝活動」嘅噪音，佢又否認外間所指，署方包庇大媽發放噪音、疑似喺公園「做生意」、「受打賞」等行為，又稱署方對取消自娛區持開放態度。似乎康文署對大媽噪音等問題「懶理」足足十多年，至於之後佢哋嚟緊會有咩行動就要拭目以待了！
大媽如「病毒」 擴散全港各區
另外，亦有屯門街坊指，大媽嘅「搵食地」根本唔喺「自娛區」，而係喺公園嘅其他區域，認為單單是取消「自娛區」，恐怕未能徹底根治問題。亦有網民指，早年旺角西洋菜南街「殺街」後，「菜街大媽歌手」就如癌細胞般擴散至港九各區，即「轉場」去其他地方繼續玩。目前中環碼頭、尖沙咀天星碼頭、土瓜灣海心公園亦有大媽為患嘅問題。野火燒不盡，面對大媽猶如「小強」的生存力及適應力，唔知其他受影響地區嘅居民會唔會效法屯門人，再次發起類似嘅遊行活動呢？
