4大屋苑靈異鬼故 網民：老豆話過咗凌晨5點就無事！｜網絡熱話
撰文：環球膠報｜圖片來源：巴打絲打「11靈異怪談」Facebook Club、網上圖片
香港4大屋苑靈異鬼故
講起凶宅就一定會諗起屋苑鬼故，以前夜晚聽電台講鬼故好過癮架，不過依家好少人聽電台架喇。不過靈異故仔真係長青題材，講極都講唔完。有人係facebook group講起「香港邊個屋苑最邪」，引起一班靈異迷講出自己個屋苑嘅故仔。
1.柴灣 漁灣邨
網友分享，有次返屋企，點知行出升降機開始就覺得有人跟住佢，但成條走廊得佢一個行，行到一半覺得後面跟得佢好近。一擰轉頭望，都未擰哂就望到牆上好似有個黑影攬埋嚟，當時佢成個人震晒，開始腳軟。但事實係無人，之後就極速返屋企。
聽到家姐把聲喺門口嗌佢個名…
網友試過家姐出咗去無返屋企一段時間，有晚聽到家姐把聲喺門口嗌佢個名，叫佢開門，佢同老豆講，老豆話無，點都唔肯開門。但網友一直聽到家姐叫佢開門，最後老豆開門畀佢睇，乜人都無，嗰陣佢突然好驚，驚到衝上床係咁喊，佢老豆話唔係家姐，仲話過咗5點（凌晨）就無事㗎啦！
2. 屯門 友愛邨
網友住喺最盡頭嗰間屋，打橫一排其他單位，好記得有晚係農曆七月十四，當晚6點幾佢媽咪煮緊飯，屋企打開木門，當年屋邨個個都係開住木門的。佢坐係門口隔離梳化睇電視，突然好大聲「嘭」一聲撞向我鐵閘，就好似有個足球踢過來，佢即起身望，無人！鐵閘仲郁緊….. 就算有人由門口跑去樓梯走都有3個單位距離，無可能佢一望係咩人都無….
有一晚，呢個超驚，網友瞓瞓下好似醒咗，感覺自己好似成個人慢慢升起，佢好大力想瞓返落床但唔得，之後個人瞓住咁轉圈，轉咗一個圈，又慢慢落返去，仲有把男人聲講好唔好玩，之後感覺到自己瞓返落床，就即郁得返，即刻轉身打側唔敢郁，嚇到天光…
3. 觀塘 秀茂坪
網友聽媽媽講過一件很邪的事件，佢父母以前經常去某一座飲茶，識到另外兩公婆，每早必定一起飲茶暢談，但有成個月沒有見到他們，心中覺得奇怪，終於有一朝早只見到老婆沒見到老公，網友媽就問她的老公如何，為何他不來飲茶，她很傷心的說她老公死了。
他們家住38座16樓，她說有一朝早起床看到有一條好大的蛇在廚房裡打蛇餅，他們很驚，於是煲了一煲滾水倒在蛇上想淥死它，蛇是死了，但到晚上她的老公也死了，網友媽說那條蛇是找替身，來索命的，有靈邪附在蛇上，聽完當堂毛管凍。
4. 荃灣 綠楊新邨
網友嗰時讀緊小學，係住16樓，放學返屋企係一個人，佢㩒咗16樓返屋企時候，升降機居然停咗喺9樓。開咗門但無人嘅，以為關咗門會上返16樓，點知落返地下。再㩒返16樓返屋企，又係喺9樓開門，又係無人嘅，又自動落返地下。
嗰陣仲未知咩事嘅，個看更叫佢撘第二部，終於返到屋企。返到去同屋企人講佢撞鬼，升降機停咗喺9樓上唔到嚟，屋企人唔信佢，之後聽返原來9樓有個婆婆過咗身，之後屋企人先信佢撞鬼！
無樓住可怕定屋苑鬼故可怕？
上面的屋苑邊個最邪就真係唔知啦，亦都唔想知。不過最尾有巴打突破盲腸話：我怕無樓多過怕住凶宅囉！你話香港人幾咁可悲？
撰文：環球膠報｜圖片來源：巴打絲打「11靈異怪談」Facebook Club、網上圖片
