《尋人記2》第八集！尋30年前好媽媽 上育兒堂學識要放手｜網絡熱話
《尋人記2》第八集！方東昇尋30年前好媽媽！
30年前，不少媽媽都愛「藤條炆豬肉」，只要仔女太調皮，就要忍受體罰。猜不到想當年，卻有「好媽媽課程」，讓媽媽們學懂做媽媽的責任與養育方法。而方東昇今次，就要尋找當年的兩位同學龔蘊然和梁惠英。跟之前方法一樣，方東昇與製作組同樣在影片中尋找線索，得知她們是防止虐待兒童會上過堂，於是致電兒童會，但年代久遠，難以尋找。
於是製作組再在影片尋更多線索，終見到幼稚園的名稱，位於屯門安定村，於是再落區尋人，並在村內找到防止虐待兒童會辦公室，並憑姑娘們成功找到當年的梁惠英。
上「好媽媽課程」學育兒大法！梁惠英：有人以為我曾經虐待兒童
事隔30年，梁惠英兩個囝囝已經長大，細佬依然與屋企人同住，至於哥哥已經成家立室。梁惠英在退休後，兼職做陪診員，而老公原來是拍廣告的演員。老公指當年自己沒有出現在影片中，笑言自己是「茄喱啡」，更怕兩位囝囝被誤以為是單親家庭，一家人氣氛樂也融融，到底又關唔關梁惠英曾讀好媽媽課程呢？
梁惠英指當年拍片，曾被人誤會自己是因為有份虐待兒童，而被採訪上鏡。「我上完堂，幫防止虐待兒童會拍片，講解課程學到啲咩，但有人就以為我係曾經虐待兒童才要上鏡，不過唔使理，由得佢哋。」面對無奈指控，梁惠英處之泰然，因為梁惠英在課程中學到的，通通都應用於囝囝上。
成功做個好媽媽？兩位囝囝：感受到佢同其他媽媽唔同
兩位囝囝指，當年都感受到媽媽的教育方法，與其他媽媽不一樣。「見到佢有時都會嬲，但見到她會選擇深呼吸，深呼吸十下先出聲，而且她會覺得，唔好講「你」嘅感受，要講「我」嘅感受。」多表達自己的感受，少指責別人和囝囡。同時，當每位媽媽都選擇發脾氣時與子女講「生嚿叉燒好過生你」、「人哋個仔好咁多」的時候，梁惠英從不會說這些說話，因為課程有教！
而節目組更提供「好媽媽」評分表給梁惠英與三位男士，三位男士給的總評分為76分，認為媽媽可以聆聽身邊人需要，不需控制。而梁惠英則認為自己的改善地方，就是降低對三位要求。
重遇當年恩師！黃錦梅姑娘：父母要學會斷捨離
後來，方東昇找到當年梁惠英的老師黃錦梅姑娘，兩人再度相遇相知。黃錦梅姑娘認為當時有課程教導媽媽，是可以讓她們在課堂上了解到孩子心理，更是一個機會找到同路人，讓大家吐苦水。感覺到時代變，父母因為太大壓力而傷害到小朋友，都令她心酸。
無論咩世代，做人父母都需要學習。所謂「生仔要考牌，就算拎到牌都有排學」黃錦梅姑娘認為為人父母，最緊要是學會斷捨離。「「養兒一百歲，長憂九十九」呢句說話唔係叫家長唔放手，小朋友大了不用你照顧了，父母要學會斷捨離，幾唔捨得都要放手。」放低唔代表放棄同仔女成長，而係跟仔女一齊成長。
大仔即將移民！梁惠英：都係要放手
梁惠英的大仔亦即將移民，對於兒子要離開成長地，梁惠英當然不捨。但好媽媽課程令她明白到自己終需放手。「佢而家長大，都有佢嘅家庭要兼顧，唔捨得固然有，但都係要放手。」講畢後更互相擁抱，以身體語言表達一切的愛意與不捨。
最後製作組更搵到好媽媽課程的另一學員龔蘊然，不過龔蘊然卻沒有勇氣再面對鏡頭，於是用電話遙距與2人聊天，重拾當年上堂的回憶。
資料來源：TVB《尋人記II》
