康文署周四起封閉所有泳灘 記者直擊封灘前「Last Day」！家長慨嘆：小朋友最後放電地方都無埋｜玩樂熱話

周四起封灘！記者直擊泳灘「Last Day」

其實封灘已經唔係啲乜嘢新鮮事，喺2020年第三波疫情嘅時候，康文署亦一度圍封關閉轄下所有泳灘，不過第四波同第五波疫情就未有有關措施。而係剛過去嘅週末，有內地網民喺微博發文批評，本港疫情持續不下，但沙灘依然人頭湧湧，更反問係咪因為天氣回暖就提早「下水禮」？網民更用深圳作例子，內容提及深圳依家同樣受疫情威脅但反應迅速，立即全面暫停堂食，甚至停止不必要活動，強調十分不滿香港市民面對疫情嘅態度。

家長慨嘆：小朋友唯一放電地方都無埋

今日記者去過兩個泳灘，分別係青山灣泳灘同加多利泳灣泳灘，發現都有幾家人帶埋小朋友嚟沙灘放電，雖然人數唔似上星期週末咁多人，而且沙灘上每個人都戴好口罩，做足防疫措施。

記者分別訪問了幾位家長同小朋友，家長個個都話連沙灘都封埋，對小朋友而言可以去玩嘅選擇又少咗。另外，經常留喺屋企對佢哋心理生理嘅成長都有所影響。至於小朋友個個都表示唔開心，因為沙灘即將封閉冇得再來玩。

疫情下小朋友好多時都宅在家避疫甚至用Zoom等程式上堂，有專家指疫情期間對小朋友嘅健康發展同心理發展都有所影響，如果小朋友嘅行為有別於日常，家長必須細心觀察同主動慰問及了解，如有需要可向學校社工尋求協助。