兩公婆去大陸旅行因不願搭檯遇襲 人夫被打到要縫6針 旅行社竟咁解決就算
廣告
香港開關後，不少人都一家大細去旅行放電。但近日有夫婦跟團去到惠洲，卻遇到襲擊，男方更被打傷，要到醫院治理，手部需要縫6針！事後旅行團和酒店的反應和賠償，卻令夫婦認為「佢地覺得好小事、佢哋完全無責任咁」！
與老婆去大陸旅行因搭檯遇襲！
事緣老公在網上開帖文，指自己與老婆在開關後，與另外兩對夫婦參加惠州2日1夜團。當時他們入住惠州雙月灣日出銀沙鹽晶酒店，在第一晚吃自助晚餐時，導遊已經要求他們搭檯，原因是餐廳太小。「導遊同我哋講餐廳唔係好夠位，問我哋可唔可以同其他2個唔識嘅人，total 8個人一齊坐張6人枱，我哋當然唔想即時拒絕，好彩最後都可以安排番我哋圍內自己坐張6人枱。」
到第二日朝早，他們去到酒店餐廳享用自助早餐，再度發生同類事件。「我同另一對夫婦total 4個人，被逼要同其他3個唔識嘅當地人(估計係中山人)坐埋，同一張6人枱食飯感覺好逼。本身我哋2pair夫婦坐低先，其餘3人之後無啦啦坐埋嚟，當時有反映過，但都係無人處理。」雖然夫婦已經識趣想快快吃完上房，但同檯有一個男人，夫婦懷疑有精神與情緒問題。不停用粗口罵他們。
人夫手部需縫6針 旅行社不退錢只XX解決！
後來，男人愈罵愈起勁，更突然拿起自助餐大碟，一下打落港男的頭。「好彩我當時反應快，即刻用手踭擋住，如果唔係擋一擋應該唔單止入醫院咁簡單。當時成隻碟比佢打到碎哂，割到我手踭爆哂血，外套都爛埋，要即刻送去醫院。」人夫去到醫院縫了6針，傷口都非常深。
人夫認為整件事最令人生氣的，是旅行團與酒店的處理方法，非常不負責任。「事後旅行社嘅處理方法就只有一句唔好意思，我哋問可唔可以豁免番第二日團費同導遊費(我哋已經畀足仲一早俾埋小費)，因為我哋第二日全日都喺醫院同落口供，點知佢話只可以畀番$100 coupon我地下次再報團用，感覺想敷衍了事。」
資料來源：FB@香港交通及突發事故報料區
圖片來源：FB@香港交通及突發事故報料區
