報稱不適唔肯落車 五名少女地鐵車廂地上又坐又瞓

撰文：Evita | 圖片：微博

少女地鐵車廂地上又坐又瞓

日前有內地網民喺其微博上載一條影片，事件發生喺廣州地鐵5號線上，片段中見到有5名衣著暴露嘅少女，其中一名企喺度整頭髮，另外兩名坐喺地上玩手機，最後兩位仲誇張，直接瞓喺地上玩電話，猶如將地鐵當做屋企，旁若無人。從片段見到，有推住嬰兒車嘅其他乘客，亦只可以被迫企在旁邊。

網民喺帖文上寫住：「行為藝術麼？應該要通過車廂監控提醒一下。」更標注廣州地鐵微博。

影片喺網上瘋傳後，廣州地鐵喺官方微博上回應：

「把地鐵車廂當成自家臥榻，小編也是活久見了，不用背《廣州市城市軌道交通乘坐守則》第十二條第六款就知道這種行為是禁止的。收到乘客反饋後工作人員跟車對當事人進行了勸止和教育。遇到此類情況歡迎大家及時反饋給工作人員，必要時可按緊急通話器聯繫司機跟進處理。」

其後廣州地鐵相關負責人就表示，經車站人員核實後，片段中喺地上又瞓又坐嘅4名少女表示自己唔舒服，但係又唔肯落車處理。

有網民留言表示此行為自私，「一腳踩落去就好」，亦有人表示曾經喺另一條路線見到同一班人：「一群人狂歡著下車，還帶尖叫。」亦有網民認為呢班少女做緊直播，希望可以「博出位」。

不過點都好，最重要都係遵守規矩，唔好影響任何人啊嘛！