撰文：關西旅行愛好者 ｜圖片：《周遊關西》截圖

細數周奕瑋6句《周遊》金句

1 ｜ 「我覺得我自己而家練得最勁嗰種力，係無力⋯⋯」

《周遊關西》第1集，周奕瑋帶大家到大阪吹田市，一間以電視綜藝節目遊戲為主題嘅室內運動場。周奕瑋喺場內試玩幾款遊戲，又要跑又要跳，仲要考腦力，玩到成身散晒。

玩完一輪之後，周奕瑋表示多款項目訓練嘅唔只係體力，仲有智力同隨機應變能力。不過就覺得自己練得最勁嘅力，係無力，真係見到佢玩都覺得攰。

2｜「真係痛風都值啊！」

《周遊關西》第4集中，周奕瑋帶大家食痛風丼。所謂嘅痛風丼，其實係指丼物有大量海鮮同刺身 (食海鮮會增加患痛風風險)，痛風丼因此得名。加埋烏魚子喺面，更會變成超痛風丼㖭！

而周奕瑋介紹痛風丼時就話：「呢一啖有蛋黃嘅蛋汁，有三文魚子、烏魚子，加埋啲海膽上去，真係痛風都值啊！」可見美食當前，真係唔理三七廿一，食咗先算喇！

3 ｜「有請冠軍，喺我個胃繞場一周！」

選美冠軍戴上后冠後，都會喺台上繞場一周，《周遊關西》第5集裡，周奕瑋去到一間米芝蓮推介嘅章魚燒食店。舖頭之所以可以突圍而出，全因章魚燒內都係用上龍蝦汁。

周奕瑋試食完8款唔同嘅章魚燒後，選出《2019年周遊章魚燒小姐》三甲，最後揀出七味粉蛋黃醬、咖喱蛋黃醬以及原味為冠、亞、季軍，再請冠軍喺佢個胃到繞場一周。

4｜「你個腎有啲虧，肺有啲廢，胃有啲無謂⋯⋯」

有睇開《周遊》系列嘅觀眾，會發現每一集周奕瑋都同攝影師互動，藉此去介紹以下半集會去嘅景點。而《周遊關西》第6集入面，周奕瑋幫攝影師做腳底按摩時話：「你個腎有啲虧、肺有啲廢、個胃有啲無謂」，認真搞笑。

係咪以為周奕瑋介紹日本按摩好地方呢？原來佢係想藉此介紹需要生理同心理做好準備嘅忍者特技體驗！

5｜「要做個好腰好腎好男人！」

要做忍者，就梗係需要良好體格，周奕瑋帶大家體驗做忍者時示範吊鋼絲打後空翻，不過腰力似乎麻麻喎！

呢個時候，周奕瑋爆出一句：「都話要做個好腰好腎好男人㗎啦！」俗語話「男人最重要係條腰」，所以阿Jar真係要努力操吓喇！

6 ｜「令和，令我好想食和食！」

《周遊關西》第7集中，周奕瑋大玩「食字」，從酒店房電視機見到日本內閣官房長官菅義偉高舉「令和」字版。周奕瑋不禁話「新年號係令和，令和幾好啊！」又話「令和令我好想即刻食和食」。

原來係想藉住講年號改變，而介紹一啲歷史悠久，橫跨幾個年號嘅食店，真係估佢唔到！

仲有尾二兩集《周遊關西》，唔知又會爆出啲咩金句呢？