買「吞拿魚飛碟」得無餡白麵包 網民爆笑：魚太新鮮 游走咗
廣告
老婆餅無老婆就係人都知，但吞拿魚包無吞拿魚，又真係唔多對路。話說有網民喺某連鎖麵包店入面買咗個「吞拿魚飛碟」，點個一啖咬下時發現中伏，吞拿魚飛碟入面無吞拿魚，得隻飛碟（即白麵包）。網民就Post相上Facebook群組同大家分享，引起熱烈討論，喺底下網民仲留低咗不少爆笑嘅留言。
撰文：GW｜來源：Facebook@中伏飲食報料區
事緣網民喺某大型連鎖麵包店入面買咗個「吞拿魚飛碟」，但打開一咬嘅時候發現中伏，竟然無餡，網民就自嘲同食白麵包無分別。
飛碟包其實是一種邊緣封密的烘底三明治，封密的邊緣令餡料不易跌出，比傳統三明治更適合放上流質或碎的餡料如吞拿魚、乾酪等。中文名亦都係因為形狀像飛碟而命名。
由於係飛碟包，所以事主食之前睇唔到係無餡，於是咬下去之後就才知「中伏」。事主就貼出咗幾張圖片喺Facebook入面同網民分享，網民就帶住同情嘅心開始嘲笑「坐飛碟飛走左，包裝有寫。」、「新鮮過頭，游走咗！」、「係咪同面包溶為一體」、「有ufo，外星人吃了」等等，亦有少數網民認真留言協助，表示「可能漏左，你攞返去換啦，換到架，我試過～」。
最新Update：
事主真係返咗去，亦真係換得返一個新嘅「吞拿魚飛碟」，希望唔會再無餡啦！
