同性戀老師被家長撞見拍拖！隔天被炮轟誤人子弟兼要求退錢｜網絡熱話

私人時間拍拖被偷拍

有一名女同性戀者發文，直言平常出街拍拖，「唔會收收埋埋，想拖就拖，想攬就攬」，隨心所欲。日前，她與女友被補習學生的家長撞見而不自知，隔日竟然狂收學生退錢要求；直至有家長手執事主與女朋友拖手的照片，「指住鬧我教壞細路又唔正常，叫我唔好再出嚟教書誤人子弟」，她才意識到原來可能因為與女友拍拖時被家長撞見，而且家長私自拍下照片，並於家長群組傳開，令她遭辱罵。

網民：香港真係好保守

帖文一出，惹起網民熱烈討論，有網民慨嘆「香港真係好保守」、「以為台灣很保守的我，來了才發現香港更保守，不只中老年人，連年輕人也很保守」、「香港是個自以為很開放但實際還是很封建的地方」。另外有網民歸究香港教育制度，「香港連身體自主都未覺醒，有個高中男同學要留頭髮而違反校規，咁都要報新聞」，正是「香港教育失敗之處」；有網民叫事主反問家長，「問佢咁叻自己唔教？就係因為咁，先要教細路性別平等」。

家長侵犯私穩 無理要求退錢可以不理

另一方面，有網民力撐事主，「佢又唔係教學生時拍拖，係私人時間，又唔係做違背道德嘅事」、「個家長偷拍都未鬧佢唔正常，仲好意思鬧你，完全唔識尊重你，侵犯你私穩」；另外有網民叫事主堅決不退錢，「家長無知，但會尊重佢唔想性小眾教小朋友，不過唔補習係你嘅事，單方面要求退學就冇得退錢囉」。

原文：

資料來源： Dcard