想減肥可以買嚟食！北區驚現中伏吞拿魚沙律三文治

撰文：Evita | 圖片：Facebook

北區醫院驚現中伏吞拿魚三文治

肚餓時食嘢醫肚係理想當然嘅事，但係近日就有網民喺Facebook群組發文，指「想減肥可以去北區醫院買包食」，原來係因為佢喺醫院買咗份吞拿魚沙律三文治，打開發現吞拿魚餡料只係塗抹喺包邊，非常慳料。

有網民就留言指醫院都係希望大家身體健康啲，因為白麵包升糖指數分分鐘高過啲餡，但係樓主就話：「我唔要健康，我想要翻啲吞拿魚。」

樓主用十幾蚊買三文治，換嚟嘅只係一份白麵包……又真係好嬲嘅！

延伸閱讀：

網民買火腿牛角包中伏

上星期有網民喺連登開帖，上載咗兩張已經咬開一半嘅火腿牛角包相，樓主就話：「買嘅時候如果唔係寫明火腿牛角包，我會以為係搓麵粉時唔覺意跌左（咗）塊火腿碎落去。」就咁睇，真係要落足眼力先見到塊火腿……碎。

樓主隨即再Po另一張火腿牛角包嘅相：「陰公豬我仲要買咗兩個，乜而家求其加塊碎落去已經當有火腿喺入面？」

其他網民就話個包又真係有火腿喺入面，舖頭又錯唔晒。

呢位網民就話幾年前食過呢間舖頭嘅蛋糕，外觀吸引但係味道就……

網民鬧爆沙律腿治「裝假狗」

有網民幫襯葵興一間工廈小食店，買咗份沙律火腿三文治，點知食咗啖發覺唔對路！樓主嬲爆將張相放上Facebook群組，留言話：「今早在公司樓下買了份沙律腿治，咬一啖已覺得唔對，打開一睇，藝術的表現，葵興_ _大廈條巷仔，大家去開記得去睇藝術品。」

「藝術三文治」介紹番

原來樓主將沙律火腿三文治打開，三文治入面塊火腿只有一小截，仲要切成一小條，而沙律醬只係塗咗麵包嘅三分之一。樓主稱呢間店為「良心舖」，仲話啲三文治係「藝術三文治」，叫大家去睇「藝術品」！

唔少網民都鬧爆食店：「好過分」、「離晒譜」，有網友食花生話：「好夠食」、「火腿無益嘛，食少啲健康啲」、「咁好心機切條，呢啲直頭良心企業喇」。

小食店店主原來有苦衷…

據知小食店店主話做係有原因的！佢哋話咁做係想降低成本：「有食客反映話想平啲，寧願唔要咁多餡，我哋壓低成本，做到20蚊兩份，朝早食完晏晝再食，平番少少畀街坊！」其實店主係為客人著想，細心聆聽客人意見後作出改善！