女司機停車場轉錯方向 狂塞門口5分鐘！即Call 2友人到場幫搬雪糕筒、倒車終脫困 網民：技術差都算 呢樣最乞人憎！｜玩樂熱話
廣告
香港車多路窄，莫講話新手上路，即使係老司機，有時都會被考起，但如果因為大意而造成不便兼嘥大家時間，真係好容易令到人躁底！近日網上流傳一條「車cam」片，片中一名女司機於離開商場停車場時因轉錯方向而堵塞交通長達5分鐘，引起網民熱烈討論，但估唔到大家最介意嘅唔係片中主角手車渣阻住大家，究竟佢做左啲咩令各人派嬲？
女司機停車場轉錯方向 狂塞門口5分鐘！
即Call 2友人到場幫搬雪糕筒、倒車終脫困
片中顯示一輛即私家車於旺角新世紀廣場停車場出口駛出時，未留意到前方「右轉」指令標誌而向左轉，欲往帝京酒店方向駛入，但發覺被「雪榚筒」擋住去路，司機即時停車，除左阻塞通往酒店道路外，尾隨車輛亦不能離開商場。該司機表現困惑同驚慌失措，但不忘戴返個口罩同打電話求救，約2分鐘後兩名友人便從酒店方向趕至，相信一開始司機原意係上去接佢地兩個。
其中一名友人甫到現場立刻將車前兩個隔開道路嘅雪糕筒移開，騰出更多空位以便等車輛駛出，但估唔到即使移走雪糕筒加上友人指導下，女司機仍未能成功右轉，反而橫霸兩條行車線，而後面尾隨車輛終於有足夠位置離開。友人見甩身無望，唯有示意與女司機換位，成功倒車右轉，事件擾攘5分鐘之後三人終於可以離開現場。
網民大鬧：技術差都算 呢樣嘢最乞人憎！
影片上傳後引來廣大網民熱烈討論， 有人表示車cam主人非常有耐性，比着其他人一早已經燥底，「呠」咗佢好耐！仲話「唔好話現場睇， 隔住個mon都睇到炆」！而有啲人就話其他車已經讓晒佢俾咗好多位，佢咁都揸唔掂不如搭車。 而有一班女網民仲覺得佢令其他女司機被人歧視， 最奇怪嘅係佢完全無視個後波，淨係識得扭左軚。
但更加多嘅聲音表示駕駛技術可以慢慢提升， 即使揸車唔叻，補下鐘就冇問題， 但係三人離開之後冇將雪糕筒放回原位呢件事激嬲咗大部份人。 因為路上雪糕筒其實有著警示作用，而其一中個雪糕筒更加有一附有個「右轉」嘅指示牌， 佢哋無將佢哋歸位，除咗有機會刮花另外一條線行駛嘅車輛之外，更加有機會造成意外，網民齊齊指出呢種咁自私以及冇手尾嘅行為，唔知大家又點睇？
事發在哪裡？
旺角新世紀廣場。
網民為何嬲爆？
除了阻塞停車場門口外，網民最介意的是事主…詳情
圖片來源：FB@「馬路的事討論區」
