中產男友拍拖一年扮窮扮抑鬱 女友一秒發怒：佢有精神病｜網絡熱話
中產男友自稱基層出身 屋企欠落一身債
男朋友肯計劃結婚，當然係一眾女士夢寐以求嘅事啦！但係如果原來佢一直以來都呃緊你，目的就係為咗測試你嘅感情，你又會唔會想繼續同佢走埋人生下半場呢？
事源女主角大學兼職打工認識到男朋友，日久生情，涿漸發展成情侶關係。拍拖初期，男朋友語重心長咁同女友講自己家底好差，基層出身，住公屋，而且爸爸欠落一身債，只有靠媽媽微薄收入支撐家庭。男朋友亦因爲家庭缺愛，加上被同學欺凌，導致患上抑鬱症。因為種種原因，怕連累樓主，想趁感情未太深厚，結束關係。
拍拖一年男友情緒病發
但樓主聽完，不但完全唔介意，仲一直留喺男朋友身邊，鼓勵佢，支持佢。樓主更有心幫助男友，不斷上網同睇書，學習與情緒病患者相處！而拍拖期間，食飯大部分時間都AA制，就連紀念日都唔敢話想食貴少少嘅餐廳。相反，樓主會出錢為男朋友訂酒店餐廳慶祝生日。睇得出樓主對段關係非常認真。
拍拖大約一年左右，樓主男朋友突然情緒病發，衝出露台想自殺。經過樓主一輪悉心安慰後，男朋友情緒穩定下來。
男朋友坦白真相 港女：我叫佢即刻離開我屋企！
後來男朋友坦白，其實一切都係佢自編自導自演嘅一場考驗，想測試樓主到底係咪真心愛佢！原來樓主男朋友不但唔係基層出身，更加無情緒病，事實係住私樓，手揸一層樓，屋企亦係中產家庭，衣食住行無憂。一切都只係測試樓主到底係貪佢啲錢，定真係愛佢個人…
事後樓主一秒發怒，即刻叫男朋友走，再透過Signal講分手！男朋友仲話，分咗手，樓主唔會再搵到個21歲就有層樓揸手嘅男人！樓主大呻畀人呃足一年，認真心淡！話覺得男朋友無情緒病，不過一定有精神病！仲話決定Block咗男朋友嘅所有社交媒體，永不錄用！
網民反應一面倒：真係好癡線！影帝仲唔係佢？！
知悉事情源由後，網民紛紛支持樓主決斷斬纜！所有回應一面倒鬧爆男事主好癲，不但利用樓主嘅信任，仲覺得所有接近佢嘅人都係貪圖佢嘅身家…….到底係咪睇戲太多！網民亦為樓主感到不值，出心出力浪費時間係一個渣男身上。
資料來源：Dcard
