10句上司乞人憎口頭禪 聽到呢句最好搵定工！｜網絡熱話

撰文：Pi、Evita｜圖片：Pexels、TVB《愛回家之開心速遞》截圖｜編輯：Evita

10句上司乞人憎口頭禪

1. 份糧包埋㗎

細個或者會認為職場係一個可以畀自己學習嘅地方，但係當踏入社會後，生活漸漸被工作磨滅，大家最想要嘅只係每個月準時出糧。打工仔認為自己將工作辦妥就夠，然而有好多上司覺得人工係包埋畀佢鬧、畀佢問候屋企人、做職責範圍以外嘅工作等等。

2. 幫我執執佢

係人都知聽到「執執佢」並唔係只係「執兩執」咁簡單啦，多數上司都係覺得份野唔掂，要你從頭再做過。仲有如果同佢講「已經做咗少少」基本上都係無用。只要你接手過一次，之後一直都係會搵你幫手，自己份嘢就會變成「你跟開」。

3. 唔識做問我

當你真係唔識做而問佢點做，佢就會話：「唔好咩都問，自己諗下點解決。」好啦，到小薯做錯嘢嘅時候就會話：「唔識做咩唔請教下人？」真係神又係佢鬼又係佢。

4. 急要

簡單啲嚟講就係叫你放低晒手頭上嘅嘢，專心做好佢突然叫你做嘅工作。所以多數OT走唔甩，但係要小心如果上司經常同你講「呢份真係好Ugrent」你就要自己衡量下係真定假喇！

5. 點解仲未有？

同第4點差唔多，上司好鍾意突然叫你停低手頭上工作，處理咗「急事」先，但係當你交Urgent嘢畀佢時，佢就會問你：「XXX做完未？點解仲未有？」喂！上司你唔係話做咗你份急嘢先嘅咩？

6. 公司唔係學校

「公司唔係學校，唔係個個咁好人肯慢慢教你」應該係好多初踏入職場嘅小薯最常聽到嘅說話。喺學校會有老師一步一步教你點做，但係喺公司就各有各忙，唔會有人願意花時間去教你兼體諒你㗎！

7. 你係嚟學嘢

通常都會出現係實習期間，聽起嚟好似好為你著想，其實只係想你依個廉價勞工幫佢做嘢，當然係唔係學到嘢只有你自己先最清楚啦。

8. 阻你兩分鐘

平時做緊嘢嗰陣上司係唔會「阻你兩分鐘」，但係往往放飯或者係收工之前先會阻阻你，而且兩分鐘並唔係真係兩分鐘咁簡單，可能會係兩個字甚至1-2個鐘。

9. 拍硬檔幫幫手

同你扮到好似好熟叫你幫手做工作範圍以外嘅嘢，當然你都可以拒絕，但係有網民表示，上司多數都會「動之以情」，指大家係一家人，互相幫忙係好事，咁你就中計了！

10. 死都同我死掂佢

基本上你聽到呢句都可以搵定工，呢個上司只係想拋個波去你度等你自己拆，而唔係同你一齊解決問題。

撰文：Pi、Evita｜圖片：Pexels、TVB《愛回家之開心速遞》截圖｜編輯：Evita