傳聞西九龍中心超猛 過山車疑因鬧鬼停駛！超多靈異事件發生！｜玩樂熱話

西九龍中心靈異事件 過山車疑因鬧鬼停駛？

西九龍中心於在1994年落成，場內設有香港首座室內過山車「天龍過山車」，記者細個都有見過人玩，每次過山車「轟隆轟隆」開出，都會聽到乘客興奮尖叫，連天王黎明、謝霆鋒及鄭秀文都坐過，絕對係紅極一時的娛樂設施。

不過「天龍過山車」自2003年便無預警下停駛，隨後惹來唔少揣測，網上有人流傳商場前身是駐港英軍的深水埗軍營，又指過山車曾發乘客被拋出車的意外，導致過山車因鬧鬼而停開。事後商場曾解釋因美國曾經發生室內過山車意外，有高層評估安全後決定停駛過山車。另外商場表示過山車領齊機電牌，設備運作正常，表示政府亦會定期派人檢查，所以不涉及安全問題。

每層都有唔同鬼＋專登飛走4字樓層！多盲人按摩店都有原因？

不過因西九龍中心自2009年開始，便相繼發生跳樓命案，網上亦流傳多個有關西九龍中心的靈異故事。早年有網民稱西九龍中心唔同樓層都有特別設計的原因，指四樓陰氣最重通鬼門，所以商場專登飛走4字樓，而六七樓有經常有人聲稱見到紅衣女鬼流連，故導致當年無人敢開舖，只得睇唔見鬼的盲人開按摩店。

不過有人認為商場只是設施太舊加上有人跳樓，才以訛傳訛，流傳場內有靈異怪事發生。其實近年西九龍中心都曾經翻新，當中food court亦有不少平價抵食之選，假日人流亦暢旺。而且最近ERROR新歌《愛情值日生》MV亦特別於西九龍中心取景，當中的遊樂場、機舖、子彈升降機絕對是港人的回憶。