準新郎大鬧婚紗店不設租借皮鞋！店家主動比折頭 最後新郎一個舉動令人超尷尬｜網絡熱話
廣告
結婚是喜事，準新郎新娘都希望可以同另一半開開心心咁籌備婚禮。不過有經驗人士都知道，如果想正常搞婚禮 (撇除旅行結婚或者唔擺酒)，中間一定會遇到好多麻煩事，有時甚至會搞到不歡而散。有做婚紗店職員嘅網民就投稿至「西客之道Hispitality Secret」Facebook專頁，指返工時遇到一對無理取鬧嘅準新人，新郎哥仲要搞到奪門而出，究竟咩事呢？
撰文：Evita｜圖片：西客之道 Hispitality Secret Facebook、劇照、Pexels
準新郎大鬧婚紗店
有一名喺婚紗店返工嘅網民分享，有日有一對準新人去舖頭詢問租衫套餐。
網民：「最多新人揀呢個Package﹐$6xxx有5套，我哋包改衫包基本配件﹐除咗女士girdle內衣同男士恤衫唔包﹐另外所有鞋襪因為衛生問題都唔包。」
而新郎哥就話：「人哋隔離六千幾有7套。」
然後網民表示每間公司收費都唔同，建議佢哋揀隔離舖頭，不過亦都主動話畀9折呢對新人。
後來新郎又再問多次套餐有咩包同有咩唔包，網民亦由頭再講多次，更重點表明唔包鞋襪。」
新郎：「我會有套白色禮服喎﹐到時我唔會買對白色鞋喎。」
網民：「唔好意思先生﹐因為我哋唔包鞋襪﹐或者你會唔會轉銀色或絲絨配黑褲？相信黑色皮鞋你應該會有。」
新郎：「咁我註冊想要白色﹐我無白色鞋你地包唔包畀我啊？」
網民表示心諗已經講得好清楚唔包婚鞋，不過都好有耐性咁同新郎講唔好意思，又建議佢著某牌子嘅白波鞋去襯白色禮服。
準新郎嬲到奪門而出！未婚妻道尷尬隨後
不過新郎哥依然唔理，大鬧：「你公司咪入啲婚鞋返黎租畀客囉！人地XX都包白色鞋啦！你公司識唔識做生意㗎？」
而網民都沉住道氣同新郎講唔好意思，話會同公司反映意見，不過新郎哥就嬲到奪門而出，而未婚妻尷尬哋跟喺後面。
網民大讚主EQ高 建議新郎哥著酒店拖鞋
事件擺上網後，有唔少網民都大讚樓主EQ高，亦有人有趣哋話下次再結婚就提供租鞋服務，更有網民建議呢位新郎哥可以著酒店拖鞋。如果你係婚紗店店員，你又會點做呢？
撰文：Evita｜圖片：西客之道 Hispitality Secret Facebook、劇照、Pexels
