東鐵綫過海段5.15通車 港鐵：打工仔每月可慳幾百分鐘！網民提兩大不滿

東鐵過海段5.15通車在即 上水40分鐘直達金鐘
港鐵高層：打工仔每月可慳幾百分鐘！

港鐵東鐵綫過海段計劃將正式於5月15日通車，到時乘坐東鐵綫南行，可以經過紅磡站，再到會展站，並以金鐘站為終點，一程免轉車40分鐘就直達金鐘！原定目標為今年6-7月通車，不過現時就比原定計劃快。港鐵總監楊美珍仲指打工仔一個月可慳幾百分鐘，但打工仔們似乎就唔多同意？

網民提兩大不滿
第一 全線東鐵列車將由12卡轉為9卡

東鐵線過海段5月15日通車，通車後東鐵線早上繁忙時間會由3分鐘縮短至2.7分鐘一班車，以疏導乘客。不過，全線東鐵亦將提早在本周六由12卡車轉為9卡，令不少網民表示不滿。

港鐵表示，即使東鐵列車改為9卡亦不會對乘客造成太大影響，因為屯馬線本身已經可以分流部分乘客，另外，港鐵亦會安排空車到繁忙車站載客，相信新列車可應付乘客需求，不過網民仍擔心逼車問題。

東鐵列車原有12卡車，即使每3分鐘一班車，單向每小時載客量亦有10.1萬人次，換言之轉新列車後，即攸加密班次，東鐵線載客量一樣會減少。有心水清人士就指，「列車少3卡，要月台等多2班先上到車，即係打和，邊有快到（目的地）。」

有乘客認為，擔心日後東鐵線改為9卡，將會更難上車。　亦有人指，「上到車先算」、「班次一樣咁疏，車卡又少咗，仲更加逼」等。有網民認為：「放長雙眼睇下我哋等幾多班車先上到去。以後搵個位坐吓都幾難。

第二 金鐘站將成「超級轉車站」再令網民不滿

另外，網民亦有第二個不滿。因東鐵線過海段通車後，金鐘站將連接4條港鐵線，成為「超級轉車站」，將來即將會有更多人在金鐘轉車。

有網民指，成為「超級轉車站」到時一定又會「亂哂龍」、「返工放工又壞車，快左變慢左嘅時候再講啦」、有人就指：「在金鐘轉車就頭痛，希望之後有改善」。

雖然港鐵指，金鐘站內將設電子屏幕顯示東鐵線和荃灣線月台實時候車情况，讓乘客掌握過海的時間。但是，網民仍然不接受，覺得港鐵想法太天真，並指日後的金鐘站，將成為人潮過海的重災區。有乘客覺得，搭東鐵線好難上車，長遠仍會選乘巴士。