【全城星戰熱】Star Wars 入侵時代廣場攻陷Google服務

Nov 25 2015

上幾個禮拜超級《星戰》迷古天樂為電影《星球大戰: 原力覺醒》拍咗條宣傳片後，引起唔少星迷哄動！《星戰》除咗以原力令古天樂成為絕地武士外，其實仲密密侵略咗唔同地方，令香港《星戰》迷未睇戲，先興奮！跟我哋一齊加入星球大戰啦，May the force be with you！

《星球大戰》・時代廣場大型展覽

時代廣場舉辦嘅《星球大戰》大型展覽會認真架勢！開幕禮除咗邀請到群星出席外，仲大放煙花，如此隆重其事，即刻帶大家睇吓有乜睇！

徐濠縈、鄭希怡、鄭融、劉威煌、徐肇平、王梓軒、楊天經、何猷啟、劉美君、關楚耀、鄺袓德、鄒文正、黃俊豪均有出席。

樂高® 星球大戰大型展覽

於露天廣場，有以樂高積木以20：1嘅比例砌出各款《星戰》模型嘅大型展覽，由經典反抗軍戰機Snowspeeder到即將上映電影《星球大戰: 原力覺醒》會出現嘅X-Wing戰機都有，另外仲有14個代表光明及黑勢力，仲有第7集嘅最新角色模型，行過見到都覺得震憾，星戰迷記得帶定相機啦！

Hot Toys 1:6千歲鷹巨型場景佈置

行上二樓，就會見到由知名珍藏人偶品牌Hot Toys製作嘅1:6比例《星球大戰:原力覺醒》Jakku星巨型場景佈置，此為亞州最大型及全球首度曝光！當中佔地8米(長)、5米(闊)、1.2米(高) ，《星戰》迷唔駛上宇宙都可以一睹仿真度高嘅戰船－千歲鷹(Millennium Falcon) 及神秘組織First Order運兵船(Transporter)外，更可以見到超過30隻嘅First Order Stormtoopers，型喎！

獨家珍貴真人原大人像

同場加映，有《星球大戰:原力覺醒》主要角色嘅1：1真人原大模型展出，即場睇到第七集嘅最新角色造型，企埋去影相，都覺得自己係其中一員！

《星球大戰》．時代廣場大型展覽：

開放日期：11月25日至2016年1月1日
開放時間：上午10時至晚上10時
展出地點：時代廣場露天廣場及二樓大堂（顯示地圖）

《星戰》光暗兩派侵略GOOGLE

想隨時隨地都加入到《星戰》? Chrome一眾用家有福了！GOOGLE 同Star Wars 推出“Awaken The Force Within“（喚醒內在原力）嘅project。一進入頁面，用家即可選擇陣營，即光派（Light Side）或暗派（Dark Side），揀好陣營後，Google嘅相關版面就跟返所選陣營嘅主題。

嗚，小編終於可以光明正大企喺暗派啦！

其後，Google相關嘅服務及程式如Youtube、Gmail、Google Map、Google Translate 等會受到有關陣營嘅「侵襲」，而變成陣營設計，內藏驚喜！
小編留返個「加入陣營」嘅驚喜畀各位《星戰》迷，注意！以上呢幾個服務都小編推薦大家係「加入陣營」後必試嘅服務！