對抗 Jet Lag ！ 記者醒你旅行出差　一覺好眠貼士

text:yuki@港女講旅行

Q1 | 曬太陽解決到 Jet Lag ？

人人都話曬太陽可以減輕Jet Lag，原來這個說法是有醫學根據嘅！因為人體的生理時鐘，會按住接觸陽光的情況而自動調整；當皮膚接觸陽光時，能產生維他命D，心情開心啲，仲有助入眠！記者試過飛歐洲，在當地的下晝時間落機，立即衝返酒店大覺瞓，反而令到接下來幾日都有時差，生理時鐘大亂。所以每次再飛長途，我都會在到達後，進行簡單的戶外活動，見吓陽光才返酒店休息，的確有幫助。

Q2 | 食啲咩可以減輕Jet Lag？

要避免Jet Lag，千祈唔好企圖飲茶或者咖啡等含咖啡因或酒精飲品，亦都唔好依賴安眠藥，以免打亂生理時鐘。反而應多飲水和攝取維他命C和D，或多吃橙、奇異果和香蕉等等。睡前不宜吃得太飽太滯，記者會在上床前，飲半杯熱牛奶，少許的飽足感會瞓得更好。另外，有空姐朋友分享心得：每次外遊都準備龍眼肉和紅棗，泡水飲都瞓得特別好，對Jet Lag有幫助。

Q3 |篤手機引致失眠？

都市人睡覺前都習慣玩手機，覆個短訊才入睡，特別旅遊期間，都會用電話跟香港親友傾多兩句或者計劃行程。但是電子儀器螢幕放射的藍光，會抑制腦內令人產生睡意的褪黑素分泌，容易令人失眠，Jet Lag問題更加嚴重！專家就建議睡前兩小時，不要玩電話。我這些機不離手的記者，難甩網癮，所以習慣上床前戴上眼罩，唔好再心思思玩電話。

Q4 |瞓唔慣生埗床，有冇幾招快速入眠？

除了要對抗時差，旅程上的另一敵人是生埗床。面對陌生環境，無論小朋友或者成人在心理上都需要「熟悉感」，記低以下幾招，助你快速入眠：

• －入房第一時間檢查會唔會太光、有冇噪音和霉味，有的話即時要求換房；否則上床前先發現，被光線氣味影響入眠，想換房都未必有其他房啦！
• －部分四五星酒店甚至可以選擇枕頭枕芯，例如羽絨、回彈、蕎麥、纖維、硬枕等等，在入住之前不妨打個電話問一問。
• －睡前要放鬆心情，泡個熱水涼；唔嫌麻煩的可以學我帶薰衣草精油，同埋私家枕袋出國，聞住熟悉的味道，一撻落床即刻可以大覺瞓。