Airbnb 遇上鹹濕怪屋主! 拆解5大訂房冷知識

May 9 2016

網民一向力讚 Airbnb 平靚正，不過始終會擔心安全問題，早前何韻詩發布午夜潮文自爆在芬蘭的確遇上屋主性騷擾，親述午夜雪地逃亡30分鐘勁驚險！就算無雜誌所講咁誇張，遇到一個暴躁包租婆對你日哦夜哦都咪話唔麻煩！今日為大家拆解5大訂房冷知識，真正遇到問題時亦會安心得多啦！

苦主－何CC

苦主二被屈朋友

文章澄清其臉書上張貼的北歐大叔唔係案中鹹濕佬，而係HOCC朋友！

點算？真係遇到怪屋主！

出發前，記得要同屋企人講低Airbnb 的地址及屋主資料，中伏時至少可以向家人求助！而且建議入屋後可以先影相，日後有爭執時便會有證據在手，網民報料曾經在日本被老屈偷熱水煲，幸好港女去旅行一入屋便瘋狂自拍，發現電器其實從來都不存在，才不至於被屈錢！如果屋主對自己有威脅，當然要立即報警及離開，Airbnb 有24小時熱線幫大家立即搵屋，所以唔使擔心會無房瞓！想避開怪屋主，亦建議在訂房時選擇「整套房子/ 公寓」，雖然價格貴少少，但私隱度高又不用跟陌生人同房，始終會更安全。

有周刊憑FB Status帶出何韻詩遊芬蘭踩中大地雷的話題，事主其後自爆案情細節，並表揚Airbnb回應迅速及專業，全數Refund之餘更將怪屋主「釘牌」。

訂房冷知識

明明係700蚊，做咩收我1,000蚊！？

收取費用其實有灰色地帶，有澳洲個案在訂房時已收取350澳元清潔費，但最後再被多收200澳元，細問下才發現原來本身只包1.5小時清潔，因為OT 2小時所以要追加收錢（佢做得慢又關我事？），簡直超級無良！遇上此類糾紛而屋主有「合理」原因及證據時，Airbnb 多數受理，自己就白白有損失啦！所以建議下訂前記得要逐一問清楚，額外收費記得要列明細項！

哼！我要換酒店！我要退錢！

如果因為住屋環境問題（網友試過突然勁大雨狂漏水），記得同屋主溝通，因為由他申請才可全額退費，否則服務費絕不退回！但遇到窮凶極惡包租婆，還是主動「出擊」吧，謹記要用登記Airbnb 時的email提交申請及留下聯絡電話，否則Airbnb 查唔到紀錄便會錯失退款時機！無得退服務費？有訂戶試過極力爭取，最終得到40美金Coupon 可以於下次使用，所以未到最後都唔好放棄呀！

去日本，點填入境表？

不時有朋友仔問入境填表時，應否誠實填Airbnb 的地址？其實建議還是應該填，但不必食「誠實豆沙包」註明「今次我住Airbnb 」，因為部分地方如日本、紐約等，關員都一定要叫你重新再填過，極度浪費時間！為何唔亂填一間酒店？因為萬一不幸出事，當地警方會根據入境表資料搜查，錯誤資料只會令獲救機會減低，填表時當去「朋友」屋企住咁填就一定最穩陣！

喊出嚟！我畀人偷嘢呀！

報警後首先要留意自己有無財物損失，因為屋主有Airbnb 提供的第三者保險，所以不必太擔心。而自己的損失，可以按照旅行保險的條約索償，點解？因為各地的法律主要針對營業者，所以個人旅遊保仍然會生效。港人常用的藍十字保險指出，除非入住Airbnb 被定為非法行為，否則受保人不會喪失公司旅遊保險的保障。所以唔好怕，出事一定要報警！