70款草莓甜品任食! 韓國地膽美食推介（下）

【弘大】－10度都食Tiramisu雪糕杯！

韓國2月天仲咁鬼凍，不過走在弘大街頭，十個路人當中仍然有三、四個手拎一個高腳杯食雪糕，路邊垃圾袋都裝滿食完的高腳杯。細問之下，原來是去年底新開的意式Tiramisu 雪糕店，以望落貴氣十足的高腳膠杯盛載，吸引不少韓妹冒住寒風都要排隊打卡呃like。天寒地凍人龍一樣無短到，記者在平日下晝3、4點幫襯，都要排足 15分鐘。店家亦有性格，只賣一款口味，對其自家Tiramisu 雪糕充滿信心。咁長龍皆因店員即場炮製，逐層加上芝士忌廉、花生碎、朱古力碎和可可粉，雪糕入口輕滑，Tiramisu 味恰到好處，不會太甜太膩，值得一排。不過，每日製作數量有限，賣完即止，建議5pm 前去幫襯為佳。

Tiramisu雪糕杯W4,900/HK$31
自家製Tiramisu味雪糕，入口朱古力味濃郁，帶淡淡芝士忌廉香，中間層的粒粒花生碎增加細沙口感。

店員即場製作雪糕，最後把朱古力磚磨成粉，灑在雪糕上就大功告成。

韓妹食客。黃娜美/金允貞今次已經係第2次幫襯啦！之前見到好多人在網上打卡，我哋都專登嚟朝聖，食完已經想encore！

Blogger Pat
我經常在弘大逛街，每次都見到大排長龍。造型夠獨特，味道亦都唔差，口感夠滑，不過價錢略為貴少少。
Kiss the Tiramisu
地址：首爾市麻浦區西橋洞336-12（顯示地圖）
電話：+82(0)10-7156-1010
營業時間：星期日至四1:30pm-11pm；星期五、六1:30pm-12mn
前往方法：弘大入口站9號出口步行5分鐘

【弘大】七彩焦糖蘋果

三層高的Rocky Mountain Chocolate Factory 在去年底開業，坐落弘大公園對面，白色玻璃外牆不太起眼，但一走入店內，這間美國品牌主打的焦糖蘋果，七彩繽紛超級搶眼，立即少女心爆發！由美國殺入韓國，改用本土紅蘋果，口感結實，每日朝早新鮮運到店面即製。為貼近韓國人口味，焦糖不似美國店甜膩，再分別沾上約20款不同topping，節日仲會推出特別版，個人最 Like M&M’s 焦糖蘋果，朱古力脆皮布滿不同顏色的朱古力粒粒，賣相滿分，影相叫夠幾款更加靚。沿路更見到不少韓妹即時外賣邊走邊食，不過食落硬身難入口，嫌大件的可以叫店員切成小塊，留在店內慢慢用餐更好。

M&M’s蘋果W9,000/HK$56

士多啤梨蘋果W10,000/HK$63

合桃蘋果W8,000/HK$50

朱古力果仁蘋果W10,000/HK$63

Blogger 少爺
呢個美國品牌前年已經進駐韓國，不過弘大新店是最大、最新的。不少弘大學生都慕名而來，三樓仲有溫習區，畀學生邊食邊讀書。

店內有超過20款焦糖蘋果，過時過節仲有特別版，不過好搶手好快就賣晒。

店內環境寬敞，落地玻璃夠開揚，難怪班弘大學生經常來打發時間。

Rocky Mountain Chocolate Factory
地址：首爾市麻浦區西橋洞360-2（顯示地圖）
電話：+82(0)70-4445-0764
營業時間：10:30am-8:30pm
前往方法：弘大入口站9號出口步行8分鐘

走入花花世界！杯子蛋糕靚到唔願食

首爾甜品潮流每季都變，蜂巢雪糕、花瓣形雪糕都已經過氣，呢期花花cupcake 在韓妹界擁有超高人氣，幾乎一人都拎住一個放上IG 晒命。其中一間以花做主題上位的Café「Blüte 」，位於cafe 集中地弘大附近，無論布置和食物都關花事！一走入店內就被鮮花圍繞，十足置身於森林小屋，原來這裡賣咖啡、輕食之餘，亦是一間花店，清新的鮮花香氣四溢，女仔捉男朋友一齊幫襯，仲可以收埋花！主打的cupcake 有雲呢嗱和紅蘿蔔兩款口味，蛋糕面以忌廉和糖霜，擠出仿真度十足的花形做點綴，真係靚到唔願意食啊！

Latte W6,500/HK$41，店員即席沖調，香味濃郁，再以鮮花做裝飾送上枱。

芝士蛋糕 W6,000/HK$38，雲呢嗱忌廉卷 W6,000/HK$38，檸檬芝士撻W6,500/HK$41

花花cupcake，W7,000/HK$44，店員每日會按心情製作不同花形裝飾，所以每次幫襯都會有驚喜。

迷你乾花束W5,000/HK$31，比起大大紮玫瑰，今期韓國人更流行送迷你乾花束，可以長時間keep起份浪漫！

Café側邊的小屋保留韓劇《春天華爾茲》場景，天花板掛滿黃色玫瑰，歡迎食客入內拍攝留影。

留韓學生 Ivy：位置就腳，不少弘大學生都鍾意來打發時間，在舒適環境溫書，人都精神啲！加上價錢唔貴，我讀緊書都負擔得到！ — 留韓學生 Ivy：
位置就腳，不少弘大學生都鍾意來打發時間，在舒適環境溫書，人都精神啲！加上價錢唔貴，我讀緊書都負擔得到！

Blute
地址：首爾市布麻浦區上水洞 86-10（顯示地圖）
電話：+82(0)2-337-5733
營業時間：9am – 10pm
前往方法：上水站出口步行10分鐘
網址：blog.naver.com/blute2010

一冷一熱紫薯甜點

前排香港掀起一股紫薯風，不過這股源於韓國的熱潮並不熾熱，作為紫薯迷，幸好找到位於安國韓屋區內，一間專賣紫薯口味的甜品店，店內有超過10款紫薯味甜品，由雪糕、韓冰、馬卡龍都有，每款的骰小巧精緻，叫滿一枱賞心悅目的紫色甜品，未吃先治癒。雖然仍是二月下雪天，但店長指紫薯刨冰最賣得，冰底以牛奶快速打成，口感軟滑綿密，再淋上自家製作的紫薯漿，濃濃的紫薯味一入口就在舌尖化開，連對紫薯不太感興趣的模特兒都禁不住食完一口再一口，亦難怪入冬後仍可以日賣50碗。食完刨冰再戰雪糕，薯香奶味濃郁，薰衣草紫色影相呃LIKE 一流。如果怕凍的，不妨叫一碗紫薯粥，粥身濃稠，甜度恰到好處不太膩。

1. 紫薯雪糕 W3,500/HK$22 每日新鮮由自家工場製造，口感細滑味濃，粉嫩的紫色加上花朵裝飾，呃Like一流。 2. 紫薯冰 W6,500/HK$41 黃豆粉、紅豆的韓冰就見得多，紫薯味卻不常見，濃郁的薯味入口即溶，來韓絕對要一試！ — 1. 紫薯雪糕 W3,500/HK$22 ，每日新鮮由自家工場製造，口感細滑味濃，粉嫩的紫色加上花朵裝飾，呃Like一流。
2. 紫薯冰 W6,500/HK$41 ，黃豆粉、紅豆的韓冰就見得多，紫薯味卻不常見，濃郁的薯味入口即溶，來韓絕對要一試！

熱紫薯粥 W5,500/HK$35，由當地紫薯加奶後打成漿，紫薯味濃而不膩，加熱後灑上紫薯乾，冬天來一碗暖笠笠又飽肚的甜粥最適合不過。

（中）士多啤梨冰 W6,500/HK$41 ，冰層中的士多啤梨奶，配埋一球士多啤梨雪糕，每一口甜味都充滿幸福感。

Blogger Pat：呢家舖隱身在小巷之中，人流唔多，不過在韓網好有人氣，吸引好多紫薯迷捧場！我試勻店內咁多款，最鍾意的是雪糕，味道好濃，不過最衰我掛住影相，食嘅時候已經有少許溶。

Bora
地址：首爾市中路區栗谷路3街75-3（顯示地圖）
電話：+82(0)70-8613-5537
營業時間：11am – 10pm
前往方法：安國站1號出口步行約8分鐘
網址：blog.naver.com/blute2010

當造70款草莓甜品Buffet

12 至4月正值韓國士多啤梨當造季節，粒粒又大又甜，唔比日本草莓輸蝕！在這段時期，首爾不少餐廳都會推出應季甜品，但想一口氣勁食士多啤梨，不妨一試 Ritz-Carlton 的草莓tea buffet，可以150分鐘食勻超過70款草莓甜品，包括Trifle、布甸、crepe、果撻等等！時間有限，主攻幾款人氣甜品，現場觀察最受歡迎的是草莓大福，糯米糍混入草莓果醬和紅豆蓉，再放入原粒草莓，水潤多汁；鬆脆泡芙配上鮮忌廉和鮮甜草莓，叫人想拎完又拎，好在keep 住refill！除此之外，每位仲包一壺茶，消滯解膩一流，叫人食完第一輪，充電再食第2 round！

（左）Blogger Pat：要買到又大粒又甜的士多啤梨並唔難，但要搵到咁有水準的士多啤梨甜品，仲要係放題任食，就要同一眾韓女爭啦！好似上年酒店舉辦相同活動，每個星期都Fu ll book，要早兩星期預約先有位！

70款士多啤梨多到眼花繚亂，拎食物唔使等，侍應仲不停refill，確保每個客都可以食勻每款甜品。

草莓Trifle有齊雜莓、吉士醬、忌廉、海綿蛋糕和啫喱，一層一層入口綿密香滑，是最高的享受。 — 草莓Trifle：有齊雜莓、吉士醬、忌廉、海綿蛋糕和啫喱，一層一層入口綿密香滑，是最高的享受。

黑朱古力Cupcake，亦非行貨，質地鬆軟，可可味濃，加上面頭生果種類豐富，層次十足。 — 黑朱古力Cupcake：亦非行貨，質地鬆軟，可可味濃，加上面頭生果種類豐富，層次十足。

朱古力慕絲果撻：酥脆撻上擠滿幼細的朱古力mousse，加上士多啤梨作點綴，見到都想食。

朱古力忌廉蛋糕：朱古力蛋糕內夾著細滑的鮮忌廉，吃來濕潤又帶空氣感，上面有紅噹噹的士多啤梨與金箔作裝飾，貴婦之選。

甜品主廚江吉元：所有士多啤梨都由自家溫室種植，每一節 buffet都差不多要用 50kg的士多啤梨！

Ritz Teassert“ Berry more” @ The Ritz-Carlton Seoul
收費：成人W53,000/HK$332，小童W35,000/HK$220
舉辦時間：即日起至 5月1日，逢星期六日，第一場 12nn-2:30pm、第二場3pm-5:30pm
地址：首爾市江南區奉恩寺路120 Ritz-Carlton酒店2樓Ritz Bar （顯示地圖）
電話：+82(0)2-3451-8271
如何前往：新論蜆站4號出口直行5分鐘
備註：須提前預約

首爾好食地圖