【18區掃食】禾輋街市搵食 冬蔭功炸蛋 +B仔翼尖
撰文、攝影:很想很想食玩訓
炸魚蛋配冬蔭 4點就收工
估唔到屋邨街市都有泰國菜食，而且好抵食，三十幾蚊就可以落樓！呢間泰國食店主打冬蔭功湯粉，湯底味濃出色，而且貫切街市食店大件夾抵食嘅特色，吸引到唔少年輕人幫襯。
金潮泰美食
地址：沙田禾輋村街市 SS02號鋪(顯示地圖)
電話：2443 5586
營業時間：10:30am-4pm
溫度決定價錢 生果檔足料沙冰
禾稈蓋珍珠！唔留心睇都唔知原來呢間生果檔有鮮榨果汁飲。老闆每日都會揀選時令嘅新鮮生果榨果汁，所以未必日日賣嘅果汁都一樣，而且配搭仲好特別添，例如石榴蘋果、楊桃雪梨、楊桃蘋果，另外仲有一兩款沙冰（不過要得閒，無咩客個陣先會整），小編去個日仲有難得一見嘅紅火龍果沙冰。呢間鮮果店除咗果汁口味難捉摸之外，連價錢都一樣難捉摸！老闆話氣溫25°C以下沙冰賣＄15杯，30°C以上賣＄20杯。咁… …25°C至30°C呢？
玲記環球鮮果
地址：沙田禾輋村街市厚和樓地下3A鋪(顯示地圖)
電話：9653 3797
營業時間：8am-11pm
宵夜首選 雞髀雞翼雞尖勁正
呢間喺街市入面嘅小食店開晏收晏，主打晚市同宵夜，雖然舖仔細細但就好有驚喜 ，有好多雞食，雞髀、雞翼、雞尖、雞軟骨都有！而且樣樣都好出色好好食！一定要試蒜香辣雞尖，好似元朗B仔果隻，爽啊！夠辣夠香，如果小編住附近真係晚晚宵夜都會過嚟幫襯！提一提大家，唔好太早嚟，如果4點幾就殺上嚟好多野都未有得試架。
潮食
地址：沙田禾輋街市地下SS18B號舖(顯示地圖)
電話：5233 3909
營業時間：4pm-2am
係街市擦完一轉，順便上隔離商場到行下街消化下，再食過！
懷舊雪糕零食屋 咖喱蜜糖魚蛋
與其話係雪糕屋，呢間懷舊小店更似一間士多辦館，入面有大量買少見少嘅舊式糖果同零食，夠晒懷舊！仲有少少熟食，例如雪糕球，鮮果乳酪，咖喱魚蛋… …每一樣都係80、90後住屋邨大嘅回憶。不過回憶同小店一樣都敵唔過時代嘅巨輪。呢間小店將會光榮結業，做到４月尾，大家如果想去懷緬一下昔日嘅兒時味道就要快喇。
南城雪糕屋
地址：沙田禾輋廣場2樓231號舖(顯示地圖)
電話：2601 2478
營業時間：1pm-9pm
媽咪雞蛋仔 坐低慢慢食
平時食雞蛋仔都係買完就一路行一路食，不過媽咪雞蛋仔今次就有新搞作，就係雞蛋仔雞蛋仔Café。呢間雞蛋仔Café， 除咗雞蛋仔之外，仲有本店限定嘅雪糕格格同雪糕三文治，唔想食雞蛋仔都可以轉下口味！呢度嘅雞蛋仔十分脆身， 秘訣原來係整起嘅時候要用風扇吹一吹佢，令佢更加脆。
媽咪雞蛋仔
地址：沙田德厚街3號禾輋廣埸2樓277-278號舖(顯示地圖)
電話：6530 5206
營業時間：12nn-10:30pm
火炭港鐵站出發 賞杜鵑花
如果你係由火炭港鐵站行去禾輋，一路行到半路，去到東華三院廖恩德紀念幼稚園出面已經有杜鵑可以睇，過埋停車場之後去到禾輋村街市旁邊、培英中學對面都有宮粉羊蹄甲睇，都開到七七八八嫁啦！記住拎埋相機去！
