1品便利 | 試食超神奇 棉花糖香口膠
廣告
韓國人真係創意無限，想食得意又新奇的甜品小食，未必要去高級餐廳排長龍，在便利店都搵得到！講緊的是首爾今期超人氣， GS25同泡泡家族聯乘推出的 棉花糖香口膠 ，睇IG就知韓仔韓妹去便利店時一定買，不過新奇甜品多數伏味濃，即試！士多啤梨味入口唔算甜，口感勁似棉花糖，食食吓變成香口膠質感，真係勁神奇！但唔建議小朋友食，因為入口數秒後漸溶化的效果實在好容易令人有吞的衝動，大家挑戰時記得要提醒自己食緊的是香口膠呀！仲有，今期首爾便利店有大量卡通踩過界，又不定推出聖誕版，大家掃貨要留意！
採訪：A君的泡菜日誌
必試1|泡泡家族棉花糖香口膠
售價：₩1,200/HK$8
必食推介：★★★★★
份量睇落好多，但成杯棉花糖最終只會變成一粒香口膠，一個人食一杯完全無問題！如果想吹波成功，就記得要短時間內食晒成杯啦！
必試２|聖誕裝Minions朱古力奶
售價：₩2,000/HK$13
必食推介：★★★★
Minions鍾意食香蕉就係人都知，今個聖誕節，除咗原味香蕉奶，Minions仲換上聖誕裝，推出了朱古力奶同栗米奶，飲完個樽洗乾淨就可以再用，正呀！
心試3|萌爆小精靈！比卡超香蕉奶
售價：₩1,300/HK$9
必食推介：★★★
之前7仔出過比卡超饅頭成為大熱，原來都有飲品！呢款香蕉奶比較清甜，果味重奶味輕，唔鍾意飲奶的朋友仔都一定接受到！
心試4|可愛小雪人！聖誕版香蕉奶
售價：₩1,300/HK$9
必食推介：★★★
呢款香蕉奶就絕對係人人去首爾都一定會飲，今次換上聖誕版包裝，小雪人勁得意，所以飲前記得相機食先！
