耐過行出禁區 拖累乘客罰錢！ 香港機場等行李 愈來愈慢之謎 ＠杜遊珍
文：杜遊珍
香港機場 行李運送排名急跌
香港機場負評多已經唔係新鮮事，都唔好提竟然將禁區變做IFC咁得番貴價名牌店嘞，最正中港人要害，係要香港人久等吖嘛！香港人出名無耐性，要開開心心去完旅行嘅港客圍著行李轉盤呆企撳手機等行李，實在是大罪！Skytrax每年調查嘅「全球最佳機場」排行榜，在運送行李方面的評分，香港機場由2015年排名全球第2急跌至2016年排第8，等行李等到火滾，絕對唔係老屈！
小齊鬧爆 等行李等到發火
嬲嬲嘅唔止普羅大眾乘客，連任賢齊早前都在微博發火，暗串喺香港機場等咗一粒鐘行李，而且不是第一次，籲機場「要加油」或者增加人手！發文翌日，小齊仲收到機管局親自電話問候，最終小齊都打圓場話自己唔應該未了解就發火，不過佢就無刪到post囉！
「等了一個多小時，起飛不準時就算了，天氣、流量管制等原因可能可以解釋！但行李⋯⋯香港機場要加油了！請多點人手，多創造就業機會！不然挺失禮的！」
除損失時間 最嬲係要蝕錢
除咗小齊忍唔住投訴，阿珍身邊有不下一個朋友試過，因為等行李等得太久，錯失尾班車要改坐兜更遠路的機場巴士甚或局搭的士，亦曾聽聞有個客因為等極都等唔到行李，遲過12點先出到禁區，還遲咗Wi-Fi蛋被罰多一日租金！無情情唔係自己嘅錯但要罰錢，唔嬲就假！
網民埋怨 等到天荒地老
好多網上討論區都討論過點解行李會愈等愈耐，有人歸咎機場愈來愈多廉航阻礙了行李運送效率，但亦有心水清機場職工爆料，勁遲出行李終極原因，係因為唔夠人手做「地牢」（即係行李落機後運回大樓的處理部門），人手不足加上新增了中場客運廊，盡做都做唔切。
機管局新出 不用呆等行李牌
回應久等行李的指控，香港機場最近推出全新服務「行李通」，將RFID技術結合要畀錢買的行李牌，售價分為普通版$30及皮革版$90，各大新聞網都直抄press release話只要將行李牌跟手機App連接，行李到埗收到通知，就可以「不用呆等行李」！阿珍睇完新聞搲爆頭，點解加個行李牌可以唔使呆等？行李會出快咗咩？
南華早報：呆等要持續 最少18個月
阿珍日前更在SCMP睇到一篇報道，行李延誤情況最嚴重嘅，主要係用緊中場客運廊嘅航班（包括香港航空同HK Express），原來機場剛在暑假才開始興建長達2公里的行李輸送帶連接主大樓及中場客運廊，預計要起一年半，即係要18個月後先有機會改善？OMG！
機管局：96.6%行李 40分鐘內送達
報道中仲提及，機場的處理行李能力，原來分最快送達及最遲全部送達：2016/17年度，首件行李在20分鐘內送出轉盤，平均達成有96.8%；至於在40分鐘內完全送達行李的比率，原來都有96.6%，照咁講，小齊等足一小時，即係嗰不幸嘅3.4%囉。
等行李 4件不應做的事
除非你無寄艙行李，在轉盤等行李是無可避免的事，以下4個Don’ts，各位千祈唔好做，見到別人咁做最好避之則吉，不然令人燥底之餘亦眼火爆！
01｜行李車超越黃線😡
久等行李已經夠燥，見到港人大陸客將架行李車片埋嚟再隊入黃線，立即無名火起！最憎有人愈行愈前，遮擋其他人睇行李轉到未，好心，拜託，文明啲好唔好！
02｜逼晒喺轉盤出口位😡
其實阿珍真係唔明，行李轉盤咁多位可以攞行李，偏偏大家都好鍾意逼在行李由地牢升上嚟嘅出口位，講真，等咗咁耐，都唔爭在呢個身位啦！
03｜即搣行李Barcode😡
即使已經攞番行李，行李篋上的Barcode都唔應該立即搣，雖然香港好少幫乘客核對行李，但外地有機場要對清楚先畀你帶走個篋，最起碼過咗海關先搣都唔遲。
04｜勿在路中心分贓😡
阿珍都知大家去旅行好開心買好多嘢，返到香港立即分贓拎返屋企最直接方便，但可唔可以唔阻住行人通道呢？其實行李大堂都有好多位置可以唔阻別人㗎喎！
