汗蒸幕 、任食三文魚! 首爾5大「夜宵磨」推介
專人配對 識返個OPPA返香港
平時睇韓劇，隔住熒光幕睇靚仔oppa，得個恨字。去到 韓國 ，當然想識返個正宗韓仔啦。在弘大就有不少酒吧 ，「쏠로포차」hunting bar 打正旗號玩配對。店員會按人數安排不認識的男女客人同枱，唔使主動出擊咁尷尬。如果坐落唔啱傾，就要靠自己要求轉枱啦。
好似採訪當日，記者和模特兒兩個女仔就被安排跟兩位韓仔同枱。場內全程播住勁爆韓文歌，仲會不時放煙搞氣氛，逼住男男女女要咬耳仔先傾到偈。 傾咗兩句先知，他們是「母胎單身」從來無拍過拖，希望可以識到女仔盡快「脫獨」。不過知我們幫襯只為工作，韓仔可能覺得無行，很快就藉機轉枱，超現實！雖然識仔仔失敗，但都是一個有趣經歷。
加上男女都無需入場費，只要每人叫一份食物或果酒就得，最平W13,000/HK$88就可以慢慢坐識朋友。不過奉勸各位女士唔好有太多fantasy，因為是絕對遇不到一個好似劉大尉的男人㗎！因為近住大學區， 蒲吧 的多數是大學小鮮肉，最多識到個韓國弟弟！
쏠로포차
地址：首爾特別市麻浦區臥牛山路71（顯示地圖）
營業時間：6pm-2am
電話：＋82(0)2-325-5959
最低消費：HKD＄88
前往方法：上水站1號出口，沿「와우산로」直走5分鐘，至「진다리로」左轉即達
全自助K房 2蚊雞唱1首歌
跟香港一樣， 在韓國 唱K 多數按時段收費。回程之前，想平平地唱吓韓文K 攝時間，不妨去位於弘大的全自助K 房「Wara Coin 코인노래연습장」，最低消費W500/HK$4超抵玩，無時限唔怕畀人趕，hea 到上機都仲得！場內超過20間K房，無人就可以入。K 房不大，最多可以坐4個人，環境幾簡陋，隔音一般，特別在無點歌的時候，記者焗住要欣賞隔籬韓仔的歌喉（瘋狂走音）。
不過這裡勝在夠平，平均$2一首，逐首歌計錢，唱到夠鐘隨時走人。歌曲選擇又夠多，歌單每日更新，不通韓文的亦有國語和廣東歌揀。
Wara Coin 코인노래연습장
地址：首爾特別市西大門區7內街1（顯示地圖）
營業時間：24小時無休
最低消費：HKD＄4
前往方法：新村站1號出口，右轉直行10分鐘即達
型爆夜光碌齡 韓妹蒲腳點
去年中香港新開一間夜光 保齡球 場，當然吸引到不少「三日香」的客人啦。原來韓國早幾年前就有得玩，單是江南都有兩間，去年新村分店開業，對於出沒弘大、明洞的遊客方便得多。一走入保齡球場，地下、球道和牆身都有夜光設計；加埋夜光球鞋和色彩繽紛的保齡球，玩得唔叻都可以影相過吓癮。
記者在平日下午5點去探路，雖然播住快歌，但得一兩個客水靜鵝飛勁無氣氛。玩咗半個鐘，先有返少少人氣。問問在場韓妹，夜晚8點到12點才是高峰時間，16條球道一定full，最少等半個鐘先有得玩。店內無限時玩，只要租鞋費W2,000 / HK$14， 加上每局W4,500/HK$30， 最平$44就有得玩。不過留意玩得太開心忘形，都要細心留意熒光幕。記者好快就玩到第5 局，最後埋單要3萬圜，大失預算！
이대 놀러와 볼링센터
地址：首爾特別市西大門區梨花女人1街10（顯示地圖）
電話：＋82(0)2-6373-7005
最低收費：每局W4,500／HK30
前往方法：梨大站1號出口直行右轉3分鐘，Yes Apm地下
首爾站 汗蒸幕 歎完即去機場
行街行足咁多日，臨走最好去 汗蒸幕 浸走一身疲 勞。Siloam 汗蒸幕主打遊客生意，餐單和設施都有中英文翻譯，櫃枱更可以寄放行李。加上位置便利，可以步行到鄰近首爾站，絕對是坐凌晨機的落腳首選。
記者在平日夜晚9點幫襯，客人不多，沖完涼浸大浴池完全不逼人，第一次跟朋友肉帛相見亦不會太尷尬。澡堂內仲有只穿著內衣的阿朱媽，推銷另加W50,000/HK$345 的全身去角質按摩。（可以講價）光脫脫被阿朱媽擦勻全身，做完真心有變滑，下次來韓國一定要再試！在韓劇和綜藝節目，韓國人在汗蒸幕例必會戴上羊角頭、飲甜米釀食雞蛋。以為入到大堂會見到「羊山羊海」？現場睇其實不多，不過問問阿朱媽，她們都會樂意教整頭巾的方法。戴住羊角頭邊歎汗蒸幕，在 40-50℃的黃土窟內爆汗，超舒服！場內仲可以玩埋健身和桌球，玩到攰，男、女睡眠室的環境夠靜，可以好好休息。晚上8點後入場只W15,000/HK$102 ，仲抵過住膠囊酒店。
Siloam汗蒸幕
地址：首爾特別市中區中林路49（顯示地圖）
營業時間：24小時無休
電話：+82(0)364-3944-5
門票：成人W10,000/HK＄68，小童W7,000/HK＄48（汗蒸幕5am-8pm入場）
成人W15,000/HK＄102，小童W11,000/HK＄75（汗蒸幕8pm-5am入場）
最低消費：HKD＄102
前往方法：首爾站1號出口，沿行人天橋至對面馬路，步行5分鐘即達
食飽先走！＄100狂食三文魚
深夜行到攰玩到餓，十有八九的餐廳都老早閂門，好在仲有弘大的 「연어상회」醫肚！餐廳開業半年，晚飯時段經常大排長龍，事關店內主打任食 三文魚 ，套餐最平不過W14,900/HK$100，包埋海鮮煎餅、炸魷魚和沙律，超級抵食。
價錢平，味道更出乎意料好。記者最愛是炸魷魚，食落香口無油膉味，更不會一口炸粉；三文魚口感肥美，新鮮無雪藏感。店長指三文魚由挪威入口，每日入貨。好味到不斷refill，至少食 足三盤三文魚先至走人，好在店員無黑面托手踭，一行人攬住肚腩超滿 足離開。不過要留意，餐廳要求最少2人同行，全枱人只能選一款套餐。
簽證：持特區護照或BNO免簽證
時差：比香港快1小時
貨幣：韓圜（KRW），現時HK$1約兌KRW148
機票推介
HK Express 每日有3班航機直飛首爾，逢星期一每日有4班，單程票價由$588起。
查詢：www.hkexpress.com
凌晨往返仁川機場
由首爾站出發仁川機場，尾巴車在11:38pm就會出發。如果錯過列車，仲有以下3個通宵入機場的方法。
方法1：的士
普通的士最多可坐4人，不過放埋行李，隨時逼到爆；如果行李太多，3人以上建議由酒店安排預約 Jumbo Taxi，由明洞至機場約需1小時，車程較快。價錢約W90,000/HK$609，人均約$150。
方法2：深夜機場巴士
首爾站開出的，再轉乘通宵巴士。不過留意每晚巴士只有4班，錯過就有排等！車程約90分鐘，價錢最 抵，一人只要W10,000/HK$68。
方法3：預約包車出發
私人包車價錢較貴，較適合一大班朋友預約。記者經KKDAY搜索，最平都要US$130/HK$1,002，最多可坐7人；記者建議透過駐韓港人Blogger安排，同一個車型只需HK$850，人均HK$122。
