首爾夜遊新蒲點！弘大旁新興宵夜野餐美食街！

Aug 26 2016

近年港人愛行山野餐，但要山長水遠先去到郊區，諗起都疲累！在首爾弘大旁的延南洞，就有一條綠林小徑「京義線林道」，弘大入口站3號出口即到，勁方便！由於附近為民宅區，不少一家大細來消磨時光，絕對稱得上是「城市綠洲」！近期更興起宵夜野餐，入夜後就換來韓仔韓妹人潮，仲話咩都唔駛準備，帶張坐墊就掂！全因公園兩旁已變成人氣美食街，一定搵到首爾最潮美食！

Text:Alex @ A君的泡菜日誌 Kimchiized Boy | Photo: Woody

「京義線林道」全長6,300米，人氣美食街集中於弘大入口站3號出口旁，大大話話都有50+間食店，但一個人只有一個胃，究竟點揀好？好彩在韓妹翻譯帶路，即睇睇佢的心水4大推介，買完行去公園席地而坐，就可以同韓仔韓妹齊齊享受宵夜野餐，舉杯暢飲啦！

1.超方便！飲品組合牛扒杯！

首爾街頭人人手上都有一個牛扒杯，問韓妹翻譯就終於知道是W Hand Steak出品，牛扒煎到7成熟，加上黑椒、芝麻等香料，香氣撲鼻，聞到即係流口水！最重要係牛扒杯下層是飲品，拎住邊食邊飲勁方便，個人推介要飲檸檬梳打，冰涼感十足，想飲啤酒都只係要加₩1,000 / HK$7，酒鬼真係無理由停手！

首爾, 夜遊, 弘大, 宵夜野餐, 美食街 — Rib Steak牛扒杯（連飲品） ₩8,900 / HK$61 – 7成熟牛扒配上不同香料，入口超多肉汁！檸檬梳打味道唔算太人工，檸檬味重好清爽！

W Hand Steak

地址：서울시 마포구 양화로23길 30 （首爾市麻浦區楊花路23街30）

電話：+82-(0)2-891-9576

營業時間：2pm-10pm

交通：乘地鐵 2號線弘大入口站3號出口步行約3分鐘

2.贏造型！低脂呃Like靚靚雪糕！

喺人都知韓妹鍾意食甜品，點解食極都唔肥？韓妹翻譯就話大家都愛食超低脂雪糕，呢間The Dala就是近期的人氣店，雖然奶味無咁重，但入口勝在夠滑，老闆仲話連配料都是黑朱古力、無糖馬卡龍等低脂小食，真係一個人食一杯都唔怕肥，加上超精緻造型，相機食先完全無問題！

The Dala

地址：서울시 마포구 동교동 152-1 （首爾市麻浦區東橋洞152-1）

電話：+82-(0)10-2073-7389

營業時間：2pm-10pm

交通：乘地鐵 2號線弘大入口站3號出口步行約5分鐘

3.勁繽紛！消暑軟糖梳打冰！

有追韓劇《Doctors》都知今期首爾興起夏威夷風，呢間ALOHA JENNY就是韓妹近期最愛的自拍蒲點，裝潢充滿異國風情，又擺滿小道具任你影！最誇張是「ALOHA JENNY」梳打冰上放滿色彩繽紛的軟糖，視覺效果爆棚，味道似波子汽水易入口，覺得熱時飲一啖，同朋友仔吹水時又可慢慢食軟糖，一杯就滿足晒兩個願望呀！

ALOHA JENNY

地址：서울시 마포구 동교동197-34 （首爾市麻浦區東橋洞197-34）

電話：+82-(0)10-4088-4448

營業時間：12nn-10pm

交通：乘地鐵 2號線弘大入口站3號出口步行約10分鐘

4.人龍店！超人氣忌廉麵包！

去푸하하크림빵時見到超長人龍，但韓妹翻譯話即使人龍幾長都一定要等，事關佢哋的忌廉麵包真係好好味！店中只有6款口味的忌廉麵包，完全以動物性奶油製作，所以保存期短，一定要即買即食！大愛乳酪口味，食落無咁膩口；原味夠正宗，奶油又綿密！由於經常缺貨，老闆教路每隔1個鐘都會出爐，所以想試勻所有味，就得要就啱時間呀！