韓國 | 入季必到 首爾食海鮮 推介清單
文:yuki@港女講旅行
1）＄200 無限時爆蟹膏放題 無限refill！
早在今年初我就在這間蟹店做過採訪，《新假期》報道出街之後，聽過不少朋友去過大讚好味，保持到水準。不過8月時，因為紅蟹不當造，曾經一度暫停任食。不過9月的時候，這個W29,800/HK$203紅蟹任食又出現啦！餐廳位置位置唔算隔涉，可以行完永登浦地下街，再行5分鐘去到樓高三層的食蟹專門店「Daege Jaldoeneun Jib」（대게잘되는집），用W29,800/HK$187任食韓國紅蟹，呢口價已經抵到爆啦！
一入店門，已經見到裝滿水槽的紅蟹，另有皇帝蟹、松葉蟹和龍蝦等海產則按時價收費。老闆話每2日， 就會由江原道束草入貨，保證新鮮。所有蟹都是即叫即蒸，落柯打之後等15分鐘左右，大大隻的紅蟹終於上枱，隻隻都起碼有600g！老闆示範一次拆蟹後，我們立刻開動，話都唔多講一句，食到舐晒脷，蟹膏肥美滿滿，食落鮮味十足。蟹腳肉鮮美結實，雖然份量比不上長腳蟹，但肉量亦都不少！當日食足兩輪，一人至少食6隻先肯收手，不過都比唔上隔籬枱的本地客，成枱蟹殼起碼一人食足十隻！唯一挑剔是任食紅蟹比較單調，另叫蟹湯和蟹飯先滿足，不過價錢都唔算貴。
info
Daege Jaldoeneun Jib（대게잘되는집）
地址：首爾市永登浦區永登浦4街98-12 （서울특별시 영등포구 영등포동4가 98-12）
電話：+82(0)2-267-3397
營業時間：10:30 am – 2am
前往方法：永登浦站3號出口步行5分鐘
2）話題木箱蒸海鮮 最尾食埋蔘雞湯
繼之前的九層塔，又一間蒸海鮮被韓國飲食節目大肆宣傳。這間「꽃핀바다」特別在招牌7層木盒蒸海鮮，由最頂層的原隻大八爪魚、原隻大龍蝦、鮮韓牛、點心、扇貝和雜錦海鮮。而最底層就是重頭戲參雞湯鍋！！！！海鮮的鮮味由木箱底部的圓洞，滴落參雞湯，吸晒所有海鮮精華，見到已經流晒口水。
這個木箱海鮮份量十足，足夠5-6個人食用。價錢$800幾，為起每人唔使$200。如果得2、3個人，人少少亦都可以自由配搭木箱，未必要叫7層！不過這個蒸海鮮位於離首爾約40分鐘車程的水原 ，以前港女都曾經在這裡返學，水原都有好多好食的、好行的！去首爾旅行不妨抽半晝去一趟！
info
꽃핀바다
價錢：₩119,000/HK$828
地址：京畿道水原市八達區仁溪洞1044-14 경기 수원시 팔달구 인계동 1044-14
交通：盆唐線「水原市廳站」7號出口
fb:꽃핀바다
3）2萬圜有找！醬油蟹任食
在香港食醬油蟹，一隻索價起碼二百蚊！即使在韓國傳統醬蟹店，價錢亦相差無幾。但位於麻浦區廣興倉站專門食醬油蟹的Kkochgelangs Saeulang(꽃게랑 새우랑)，一個人最平只要W15,900/HK$100，就可以無限refill、無限時任食醬油蟹和辣蟹！店內亦提供其他任食package，貴少少一人W19,900/HK$125， 仲包埋蟹湯任叫和3隻醬油蝦！
但以為平嘢無好？食落好有咬口！吮一啖，蟹肉連同醬汁入口，鮮甜不帶腥。一邊食一邊懷疑點解咁平？老闆親自解畫，用的蟹偏小，每隻約4両重，不過蟹仔細細， 肉質卻出奇地飽滿，醬油的香味更能充分滲透入內。所有蟹來貨自仁川，經過最少3日醃製，先會畀客人食，夠晒入味。每次收到客人refill 柯打後，再從冰櫃取蟹，即場拆蟹逐隻抹上秘製醬料，亦都保證衛生。
info
Kkochgelangs Saeulang(꽃게랑 새우랑)
地址：首爾市麻浦區玄石洞 1-9（마포구현석동1-9）
電話：+82(0)2-706-2828
營業時間：11am – 10pm
前往方法：廣興倉站4號出口步行10分鐘
4）55cm霸氣海鮮煲
香港人一年四季都愛打邊爐，韓國人唔興烚下烚下，不過就最鍾意食蒸海鮮鍋。幾年前的九層海鮮鍋贏盡話題，但講到當地人真心捧場的，就要數蒸海鮮鍋的連鎖店「숙이네 조개전골」。他們主打的55cm超大海鮮鍋都唔輸蝕，一樣夠搶眼，出名又抵又足料。釜山本店在13年開業後，仲進軍埋首爾，就知當地人幾buy！
店內只賣蒸海鮮鍋，分四款不同大小，專誠來到當然要見識特級size有幾特級啦！鍋內海鮮大部分由釜山每星期直送，有1隻花蟹、3隻鮑魚、5隻花扇貝、6隻大蜆、8隻帶子、魷魚、數不清的青口、圓蜆、名州貝和百合貝等等超過10款海鮮，店長最後在水槽更即捕一隻生猛八爪魚先至蓋上鍋蓋開火。湯底以韭菜、洋蔥、海帶和胡椒淆成，煮完一鍋海鮮都沒有腥味，食到最尾加埋刀削面，吸收海鮮湯的精華，每一啖都好鮮甜！特級大小只要₩63,000，我們一行5人飽到摸住肚腩離開，每人都唔使 $100！
info
숙이네 조개전골（淑家貝殼蒸鍋）
地址：首爾市九老區九老洞30-32
電話：+82(0)2-861-6522
營業時間：5pm-2am
前往方法：新道林站3號出口步行5分鐘
5）蜆貝任燒 貝殼精天堂
講到燒貝，相信很多去過首爾的朋友都食過「貝穀倉庫」，食過都讚性價比高，下次再來可以再encore！難得「貝穀倉庫」並沒有蠱惑規距，無需3人同行，收費斷人頭計夠均真，逾25款貝類通通任食，更不設時間限制，可以一次食個過癮。做任食的，店員不會黑面小氣，唔需要落單紙等一世，而是大方讓食客親自走去魚缸任夾。貝類每日最基本都有25款，全都是活生生夠新鮮！
按店員指示将拳頭一樣大的蜆、帶子、鮑魚等用中小火慢慢烤，細細隻的蜆烤至張開後即可，鮑魚要烤4分鍾，帶子要烤7分鍾，海螺烤5分鍾至泡沫完全蒸發，吃時再蘸上芥末醬油、勁辣醬或酸甜辣椒醬，入口只有鮮甜兩個字來形容！貝類以外，還有兩大個雪櫃放上血腸、竹筒飯、雞肉棒、五花腩、大蝦、餃子、蔬菜等逾30款的串燒，絕對挑戰你胃容量。
INFO
貝殼倉庫
地址：首爾市城東區下往十裏2棟966-12地庫1樓
電話：+82 (0)10-2650-0449
營業時間：星期一至六5pm-1am，星期日及假期5pm-12mn
交通：地鐵2號線往十裏站11號出口，直行約150米，於戶外用品店Wildroses旁邊商廈直入
網址：www.jgbox.co.kr
