韓國 首爾酒店 | 住明洞好伏？ 記者推介住邊區更好
text:yuki@港女講旅行 photo:新傳媒資料室、網上圖片
網民齊齊呻！住明洞5宗罪！
去首爾=行明洞，不少人都認同吧！不過作為住宿地點，明洞其實並唔稱得上是最好的，人多車多大陸人多，落街一定聽到國語；明洞站的交通不算最方便，去多個門旅遊點都要轉乘。繁忙時間想行去乙支路3街乘2、3號線，繁忙時間最少行15-20分鐘；行街淨係得大牌，小店選擇不多。港女記者一樣中過伏，試過夜晚11、12點落街，大部分舖頭閂晒門，餐廳選擇更是少之有少，夜鬼一族千祈唔好入住這區！所以記者次次出差，都唔住明洞，而是入住其他地區的酒店。
#交通最方便－往十里
往十里是大站，總共有4條地鐵線途經此站，無論是往南向江南出發，或者坐2號線直達弘大、梨大市廳都好方便。唔想齋行街，仲有春川線直去九里、加平、春川等，四通八達！
ｖ交通四通八達
ｖ大多是3星經濟型酒店，價錢較便宜
ｘ酒店集中在往十里站2號出口，酒店數目唔算多
酒店推介:Hotel Forestar （房價約$700/晚）
2016年新開酒店，夠新淨。記者住過1次，服務唔錯，房間設計好型，跟一向住開的商務房不同。落街距離車站5分鐘路程，方便！
#夜鬼最愛－弘大
同樣是旅遊旺區的弘大有不少街頭小食，而且不少餐廳都會營業至凌晨時分，建議夜鬼必住這區！而且在弘大掃貨多選擇，無論大牌、小店都有，星期六日仲有市集。
ｖ餐廳選擇多，而且不少都開到凌晨2、3點，夜鬼宵夜精最愛
ｖ酒店選擇多，貴價、商務抑或民宿都有，豐儉由人
ｘ慎選酒店位置，避開臥山牛路一帶，夜晚唔使畀蒲吧人士嘈親
酒店推介: AMANTI Hotel Seoul（房價約$800/晚）
2016新開酒店，與購物區只有10分鐘路程，不會太過嘈吵。記者最欣賞它的房型夠多，有3人單床房，3人行都可以住埋一間齊齊玩。
#蒲精必住－新論峴
大部分去弘大區酒吧的，多數是大學生，直頭是韓版「旺角」蒲場。唔想齋同小鮮肉一齊玩，記者推介入住新論峴站一帶的酒店，夜晚蒲完只需10分鐘車程的狎鷗亭，去埋江南飲多round再行返酒店都仲得！
ｖ酒店選擇多，唔怕full book捱貴房
ｖ與酒吧區有幾街之隔，夜晚不會太吵鬧，蒲完坐10分鐘的士即返到酒店大覺瞓
ｘ交通不算方便，去明洞、弘大等旺區需轉車
酒店推介: Hotel the Designers LYJ Gangnam Premier （房價約$600/晚）
住厭商務酒店，一定會鍾意呢間！房間設計夠型格，且位置極佳，正正在地鐵站出口附近，只需2分鐘路程！最重要的是房價唔算貴，每人$300蚊晚，CP值高。
