空氣劉海+最潮唇妝+防黑頭 | 街頭直擊5大韓妹熱捧 韓國 夏日 美妝品
Text：CKL | Photo：Woody
01 | 擁有韓式空氣劉海：Staroll USB髮圈
韓式空氣劉海仲流行？係，熱潮係稍退咗，但係依然熾熱，人氣女團Blackpink的Rose全新MV〈As If It’s Your Last〉裡面首次嘗試空氣劉海造型，立即被人狂讚可愛，而且望落更年輕。
要keep住空氣劉海，一定要用髮圈，仲要係無時無刻得閒就用一用。韓國坊間有好多款USB髮圈，但據聞連EXID嘅Hani都用嘅「Staroll」最受歡迎。
「身邊個個朋友都係用呢個牌子，叉電時間只需要2-3分鐘，好方便。最重要係有50mm大圈選擇，令空氣劉海造型更加自然。」
02 | 預防黑頭必備：COSRX白頭水
熱到死嘅夏天又係面油白頭黑頭蒲頭嘅季節，對女仔嚟講，有黑頭簡直肉酸過生暗瘡。所以响黑頭未成形前，已經用定產品預防，去白頭嘅專用護膚品。韓妹界最近大熱推介COSRX AHA7白頭水，只要敷响鼻頭上，約5分鐘洗走即可，一星期兩次，就可擁有白滑鼻頭。品牌強調成分係75%蘋果水、7%果酸成分Glycolic Acid，算係mild唔怕太刺激，但店員都建議不宜用得太密。
「關於鼻嘅保養我哋全部女同學都會用COSRX AHA7；味道唔係太好聞，但勝在works，用完後好少會生白頭黑頭。」
03 | 唔做「狐Seoul妹」：Labiotte香體膏
好少女仔有狐味，但如果出汗太勁都會無可避免有少少汗味。要keep住香的話香水係大家的好朋友，但香水始終揮發性太強，噴唔夠一個鐘已經無晒香味，所以韓妹好鐘意用香體膏。
碌碌碌的香體膏揮發性低，碌兩碌可以香半日。近日大熱嘅有TonyMoly年輕副線LABIOTTE（話說我覺得TonyMoly已經感覺好年輕），之前推出嘅酒樽形唇彩瘋魔韓國全城，新出嘅隨身小香膏都係用酒樽形，瘦瘦長長大過潤唇膏少少，放入袋易收藏。
雖然韓國香體膏有好多種，韓妹話揀LABIOTTE係因為佢強調無任何酒精成分，只用成分天然的基底油，敏感肌也一定用到。
總共有4種味，韓妹推介呢款橙色Fine Fever係用柑橘油做基底；香氣好清新亦好突出，唔會俗氣。
「一系列香體膏香味都好清新，而且唔係用酒精成分，香氣可以keep好持久。搽响手臂內側或者手腕部位，每一個動作都會聞到香氣，好醒神。」
04 | 金所炫代言勁斷貨唇妝：Peripera
Peripera系列唇妝，價錢平又多色揀，一直都係韓妹的心水，加上仲有10代人氣女星金所炫代言，更加受歡迎。Peri’s Ink Velvet今年SS全新5色一出即賣斷巿，我走咗幾間Olive Young先買到1支＃15色Girlish Red。
搽嘅時候質感好水潤，但係得出嘅唇色係霧面感，最重要係持久6個鐘都唔甩色。
「Peripera肯定係我哋嘅心水唇妝品牌，每次出新色都會一窩蜂衝去買。顏色靚選擇多而且好顯色，最近嘅Ink Velvet身邊個個朋友都搶#13色Charming Coral，但好難買，成日斷貨。」
05 | 穴位按摩Mask：Mediheal面膜
Mediheal嘅Mask款式多又夠搞鬼夠噱頭，一直好受超級熱愛自拍嘅韓妹歡迎，老實講除咗噱頭其實佢哋嘅Mask又係幾works所以先受歡迎嘅。強調所有產品都係經皮膚科醫生測試，咁就可以保證安全啦。
近排最人氣一定係呢款布滿晒穴位按摩位置嘅Mask啦。一拎上手就見到好多點點，放上面後就跟住點點去按壓下當按摩舒緩下囉。怕位置唔啱最好係對好兩邊眉頭嗰兩點位置先放上面。
「Mediheal的Mask好多花款，高中時的同學仔個個都會買來用，自拍夠噱頭嘛。呢款可以配合按摩穴位好好玩呀，有種一物二用感覺，係價錢貴少少不過都接受到。」
