母親節要快樂啊～帶住阿媽去旅行 13個激心中伏位 @杜遊珍
01. 酒店住宿 ──── 名牌要緊、小眾累事
阿媽真係好唔識欣賞嗰啲好rustic 呀、industrial 呀、artistic 嘅設計，仲會嫌唔夠光猛、啲畫邪邪哋，所以請你盡量揀佢懂得嗌酒店名的地方，例如四季、半島，平啲可以揀Four Points by Sheraton（ 因為有「喜來登」三個字）， 以曼谷為例， 半島經常做4K 樓下的四天套票，好抵，好啱帶阿媽去！
02. 膳食安排 ──── 地道行先、掃街最潮
再以曼谷為例，盡量帶阿媽去街邊檔，因為佢哋真係好鍾意食！濕濕哋嘅河粉、香噴噴嘅串燒，仲有芒果糯米飯，硬係覺得街邊好食啲，因為有風味之餘，亦係唯一可以通知師奶fans「我做過當地人」。
03. 食量估算 ──── 多菜少肉、少食多餐
雖然阿媽食得唔多，但通常好為食，好似金魚食極唔飽，同時又不斷話：「我依家食好少㗎、蒸條魚烚條菜就係一餐。」 你由得佢講啦，你話去食喇沙佢就話好㗎喇！另外，阿媽係好喜歡去果園的，即摘即食嗰種！
04. 景點策劃 ──── 超市才是王道！
之前提到寺廟只是到此一遊，真正戲肉係超級市場！有朋友兩年前去沖繩，幾乎去勻全島AEON（ 當時仲叫「吉之島」），每晚買生果作宵夜，仲要抬返幾箱返香港，成班阿媽親戚已經好開心，今年過年仲講緊！另外曼谷Big C就更加係父母逛到唔願走的shopping大觀園⋯⋯
05. 腳骨力評測 ──── 攰都唔出聲
自由行當然冇旅遊車點對點運送，路就自然行得多，但老人家幾時攰真係好難估，最常見就係勁攰都唔出聲，返到酒店對腳痛到第日行程半取消咁滯！心得係： 你自己覺得開始攰時，相信就係阿媽需要坐低休息嘅時間時，將體力同步，先可以齊齊去得更遠嘛！
06. 讀心神探 ──── 狂講悔氣說話
阿媽成日去親旅行都狂講悔氣說話，又話食和牛貴、又覺得啲景點西貢都睇到。不過其實佢哋都只係呻吓，實質上睇完、食完返到去就會同身邊師奶嚟個「軍備競賽」，曬命自己去咗邊，所以佢話唔好食、景點無特別都只係講吓，聽完唔使太上心！
07. 耐性暴跌 ──── 唔願排隊
去得好味嘅餐廳，排返15分鐘都係基本，有時甚至要等1個鐘。一見到條人龍佢哋猶如撞鬼，擰晒頭嗌要走，但呢個情況可以理解，特別去旅行已經要行咁多路，仲要企咁耐去食一餐飯。不妨去搵餐廳時揀比較早嘅用膳時間，錯開人流高峰時間，食都食得開心啲。
08. 最好又要最抵────嫌三嫌四
師奶向來都係慳家專員，又要抵食但又要好食，成日都嫌三嫌四，哪來咁多 CP 值超高嘅餐廳、景點？出發之前同爸媽預告定某啲餐廳、景點會比較貴，畀定相佢哋睇，用多少少錢都值得！戴定頭盔到時就唔怕有太多怨言。
09. 使費預算 ──── 充大頭鬼
有時搵到錢想帶爸媽去旅行，佢哋總會話嗌埋姨媽姑姐去，去都算，自己應該淨係出父母份錢；點知佢哋會充大頭鬼，要請埋同行親友食呢樣個樣，用多咗仲要仔女填返嚿錢。唔想阿爸阿媽充大頭鬼，去之前就講定一齊夾一個「阿公」出嚟，要食飯就喺阿公到拎出嚟，實行家族AA制！
10. 勢不低頭 ──── 以為自己乜都識
「唔使問人啦，行呢邊咪啱囉！」明明未去過嘅地方都講到好似當地人咁，呢個情況最常喺老竇身上出現。其實Google Map咁發達真係睇吓都無問題，如果預到呢個情況，就挺身而出講句：「唔使嘈！我去問！」，因為佢哋都只係覺得唔識要問人好失禮啫。
11. 守舊思想 ──── 唔肯試新嘢
阿珍就有同事講過，佢爸爸去到美國都淨係想食中菜，點都唔肯試吓西餐。鍾意食海鮮又瘋狂搵海鮮餐廳，完全無諗當地出唔出名。老一輩係比較抗拒新事物，但既然帶得佢哋去旅行，證明已經係新嘗試，不妨遊說吓父母！
12. 乜都要管 ──── 阻止買嘢
自己去旅行或者同朋友去，都會有瘋狂 shopping 嘅部份，但同父母去，佢哋就會怕大花筒，不停咁阻止自己買嘢！去到外國都唔買真係對唔住自己㗎嘛！
13. 慳過頭 ──── 貪小便宜
溫泉旅館浴衣又要拎，以前飛機上面鐵叉都要拎，貪小便宜嘅程度猶如參加咗《慳錢家族》，見到呢啲事真係覺得好瘀，但出聲佢哋又話我哋煩。陣間貪貪吓連香港人個名都整衰埋！
不過，既然帶得爸爸媽媽去旅行，都一定預咗同自己去旅行有分別。不過，佢哋當年眠乾睡濕湊大自己都無怨過，一年先辛苦幾日帶爸媽去旅行，又有咩咁大不了？
下一頁：【帶住阿媽去旅行】每年一度 二人成團｜阿媽泰姬陵前表演瑜伽
