獨食 酒店upgrade 超級套房 折墮豪住撞板宅錄！@杜遊珍
廣告
對於住豆膶細屋的香港人，去旅行當然個個都恨豪歎 酒店upgrade 房，愈大愈好啦。杜遊珍行走江湖多年，出差公幹往往有出乎意料住宿安排，例如豪歎總統套房、隻身試住法式古堡、獨佔整幢複式Villa 乃家常便飯，講出嚟可能好離地，Well，其實地方太大真心有唔少煩惱，仲要用奇招來拆解，就等我分享下三大「折墮心跳回憶」啦！
最誇張 酒店upgrade
最浮誇係幾年前試住峇里某resort， 無啦啦upgrade我，「房」嘅範圍包括一座4,000幾呎兩層主大宅，園內另有4間獨立平房，直頭可以拍到成集Running Man！
＠峇里－結界封印隨行物品
有得入住成條村咁大嘅「房」，阿珍開心過龍將部電話隨手放低，轉個頭就忘了，要叫埋打掃姐姐同我一齊搵！嚇到我用凳、花樽之類於房內劃出「結界」強迫自己將所有私人物品放入去，拖鞋、背包、一袋二袋手信圍成一堆，嚴禁過界！
＠斐濟－窗多門多慘慘豬
四四方方間隔都算啦，有次又係住斐濟超豪resort，獨立屋連花園泳池，九曲十三彎設計加上n道落地開放式大門窗，海風吹拂隨時跳入泳池好爽皮？最慘晚上忽然大雨，阿珍立即東奔西跑去閂窗，住唔慣豪宅更怕夜半有賊，真心精神緊張啊。
＠台灣－「吉床」戰勝大法
親民少少上個月去台灣住民宿，去到時發現Over-booking，得返一間6人房，相信類似情況時不時會發生。阿珍一丁友望住三張大床，畀你會選擇瞓左中右邊一張？邊張都好，有老前輩教過，記得將「吉床」被鋪整亂，求個安心，大家都唔想獨樂樂變成「眾樂樂」嘛！
