文:yuki@港女講旅行

　　攝：鄭中基提供、scott
hair: HORACE TSE@ hair play；make up: Mon Chun；wardrobe: D_antidote @runway_workshop（外套、褲）、theinjury @runway_workshop（衫）

攝影宅：網上平台最優秀的leica「蒙面」攝影師tinyeyes係鄭中基！

當歌手今期仲流行蒙面唱歌玩神秘感，Ronald早在幾年前就識玩這招。翻查舊報導，原來他曾經以tinyeyes的帳號在Flickr分享作品。即使隱藏歌手身份，依然吸了一批新的粉絲。到底呢位「蒙面」tinyeyes有幾利害？舊報導指：「他是當年flickr上最優秀的leica攝影師之一，與日本的Tommy Oshima齊名，聽到已經覺得勁啦！

在今次訪問，Ronald對「蒙面」攝影師這個身份直認不諱。不過早在07年，他已經把所有照片轉為私人，再不跟粉絲分享，究竟點解？佢話：「幾年前在Flickr放相，只係想跟其他人交流吓，點知有日我發現有宣傳單張偷用了我影的相，無問過之餘，設計印刷又唔靚，仲要俾人丟喺地下，搞到我鬼咁傷心，加上又被踢爆身份，所以咪收自己皮囉。」

專訪講攝影，陳年＋新相開倉

隱藏的攝影師身份公開之後，很多Ronald的粉絲都曾經要求他重開帳戶，供開他的舊作欣賞。佢話暫時未有這個打算，不過三不五時都會在FB放最新拍攝的靚相。好似最近他去了馬代旅行，就在當地拍攝了一系列靚相！最特別的是平日見到別人都只會分享三點式、陽光、海灘，Ronald卻是在網上分享了在馬爾代夫的夜景，念頭夠新之餘，亦都可以透過相片，感服到馬爾代夫漫天星空的寧靜感。

（下頁仲有其他暴龍哥的陳年靚相作品開倉！）

鄭中基：三更半夜，一個人出街，影夜生活，唔係蒲天光！

或者他一口鄉音、嗨嗨聲食牛歡喜的形象太入腦，又點估到拎起鏡頭的暴龍哥一臉認真。在採訪當日走入《新假期》攝影樓，放低未來得及吃的飯盒，他就急不及待拿起枱面上的幾部相機，和攝影師兩個大男人聊起自己的興趣：「你這一部機是M4 ?」、「這部相機是否沒有測光？」男人沉迷攝影，比女人追韓劇更瘋狂。

他說：「正式接觸影相是在入行之後，最初連光圈、快門都未搞清，好在身邊很多的攝影師可以偷師。」十幾年來影落的相足足儲滿10個硬碟，「以前後生做事好心急，咩都要快快快；但影相無得快，影日落、星河，由朝等到晚。試過用4×5影星，捕足 10幾小時；亦都試過三更半夜一個人出街，影吓夜生活；影得多就訓練到愈來愈有耐性，你睇杜汶澤都係因為影相先定到性！」

講到咁多年以來最滿意的作品，他心中的第一位的絕對是印度。「做演員對攝影都好有幫助，鏡頭、角度其實都是互通的。而且電影不時去其他國家取景，會有好多新的靈感。我最鍾意拍《喜馬拉雅星》時到印度取景，只要唔望地下的垃圾、牛屎狗屎，真心隨手影都好靚！可能因為色溫的關係啦，影的相色特別鮮色！」

網民︰唓! 百幾萬器材，影相咪又係靠靚機？

傳Ronald有一部超過廿幾萬的限定版菲林相機，搞到網民諷刺他影相靚，只不過是因為有錢買靚機，「第一部菲林相機，是搬屋時找到阿爺留低嘅Leica M3， 50年代產嘅型號無測光，要由最基本用錶測光學起。之後菲林影得多就上癮了。但我買機係應使得使，機身不會追款，想影靚相反而係追求鏡頭質素，我諗這10幾年來應該花了百幾萬在攝影。不過硬件只係輔助，最重要係技術技術技術囉！」

這幾年他的音樂和電影作品減產，花更多時間在家庭和做攝影。最好的模特兒，當然就是老婆余思敏（Sammie）和一對仔囡。「我喜歡影人多過影景，特別小朋友出世之後，日影夜影，不過影小朋友難控制，特別係阿囡長大，見我影菲林慢吞吞，影完一張又一張，嫌我煩轉過身就走唔理我。」