英國首間 過山車主題餐廳 ! 3層樓高霸氣送餐

英國斯塔福德郡（Staffordshire）主題公園Alton Towers，喺5月13號，開咗一間 過山車主題餐廳 ，Rollercoaster Restaurant。餐廳內嘅食物會經過一條長達400米嘅架空運輸路軌，途中佢會好似坐過山車咁兜返幾個靚圈，再完好無缺咁送到你手上。路軌高度約 7.9米，差唔多有3層樓咁高，平時睇人玩過山車就睇得多，原來睇住自己啲食物坐過山車都好過癮！

過山車主題餐廳 極速傳說！過癮等食！

透過呢兩條官方嘅宣傳片，就可以感受到咁樣送食物法到底有幾過癮！

再望埋呢條官方實拍嘅片，就可以睇到一車車食物排成一列，高速衡落嚟嘅場面有幾咁震撼！唔講以為玩緊四驅車啊！

個路軌真係高到影極都影唔哂，如果李白仲在世，見到呢個場面，應該會講句「英國炸雞天上來，奔流到肚不復回」！

菜式包羅萬有！肉扒、海鮮齊全！

所謂醜婦終須見家翁，話知你用過山車送食物定抑或侍應踩著鋼線，一邊表演，一邊上菜啊！一間餐廳嘅靈魂就係食物，唔好食嘅話，搞到天花龍鳳都係假！之但係大家都明白，主題餐廳就等於伏嘅呢個道理，相信大家都唔會對呢間餐廳嘅食物帶有期望。但係你地咁諗就錯啦，有唔少客人食完都話正，就連英國記者試食後都話唔錯啊！價錢由10鎊至30鎊不等，而菜式包羅萬有，美國菜、英國菜、印度菜、意大利菜、日本菜…

我諗睇到呢到，好多人會問，究竟佢地用咩方法去送紅白酒，而又唔會整到啲食客濕哂呢？答案就係…最傳統嘅方法…過山車做唔到嘅野，就靠侍應嚟搞掂佢啦！

菜單詳情：接我

Rollercoaster Restaurant
地點：Farley Ln, Alton, Staffordshire ST104DB英國 （顯示地圖）
時間：10:00am-10:00pm
Facebook：Alton Towers／ROGO’s Rollercoaster Restaurant
官網：https://www.altontowers.com/activities/places-to-eat/rollercoaster-restaurant/

備注：可訂位。主題公園關門後只招待過夜遊客。