西澳靚景篇│人氣粉紅湖＋即捕即食龍蝦＠Travel佳

去西澳，好多人主要玩珀斯，但係其實只要搭一個鐘內陸機、駕車，又或者想懶嘅跟local tour，即刻可以去珊瑚海岸（Coral Coast），沿岸玩盡幾個熱點！我Travel佳今次就想同大家親親大自然，淨係睇超夢幻粉紅湖、近距離接觸尖峰石陣沙漠、跟漁夫出海即捕即食新鮮爆燈嘅龍蝦，上山下海落湖玩盡5大推介，已經可以玩足幾日！鍾意睇靚景、影靚相、食海鮮嘅朋友啱晒！

1 西澳勁夢幻粉紅湖

有「粉紅湖」之稱嘅赫特潟湖Hutt Lagoon（Pink Lake），係位於珀斯以北Geraldton嘅Port Gregory，面積2,500公頃，就算坐飛機喺高空都睇到呢個一片嫩粉紅色嘅湖泊，夢幻到暈！

粉紅湖旁設有一條路可以慢慢行、踩下單車、影下相。 — 粉紅湖旁設有一條路可以慢慢行，踩下單車、影下相。

究竟點解赫特潟湖會呈粉紅色？原因係呢個湖嘅鹽分濃度高達60%，鹹度比一般湖、甚至海水仲要高。而且水中有「杜氏鹽藻」，呢種海藻好鍾意鹽（而只有呢種藻類先可以喺咁鹹嘅湖生存到），亦因為佢含豐富胡蘿蔔素，所以就會將湖水染成粉紅色或紅色；再加上高溫同充足陽光，湖水睇起上嚟更加似胭脂咁靚嘅粉紅色。

想一睹粉紅湖嘅驚艷，可以喺湖邊行住睇；想豪啲，跟local tour坐飛機睇亦得！

Geraldton Air Charter 粉紅湖空中觀光導覽

地址：Gordon Garratt Drive, Geraldton Airport, Moonyoonooka, Western Australia 6532

網址：www.augac.com/t_index.htm

跟團坐小型飛機，可以由另一角度欣賞粉紅湖，高空望落去一格格的「田」，就係正在提煉胡蘿蔔素做天然化妝品。 — 乘坐小型飛機，可以由另一角度欣賞粉紅湖，高空望落去一格格嘅「田」，就係正在提煉胡蘿蔔素做天然紅色素。

https://www.youtube.com/watch?v=LYgIGCDUJ1g

&feature=youtu.be

2 做半日漁夫即捕即食龍蝦

粉紅湖一般玩半日就夠，咁其餘時間做乜好？我Travel佳幫你plan埋喇！就係去傑拉爾頓（Geraldton）碼頭，跟local tour出海做漁夫、捉龍蝦！有經驗豐富嘅漁夫帶住實有收穫，喺船上馬上就歎即捕即燒嘅龍蝦，夠晒生猛新鮮喇啩！依家呢個季節啱晒喇，因為到澳洲夏天可能會遇着漁夫維修船隻，就無得出海！

Batavia Sea Safaris

地址：Geraldton, Western Australia
Facebook：Batavia Sea Safaris

西澳Coral Coast盛產野生龍蝦，跟漁夫一齊出海捉龍蝦，就可以食到最新鮮生猛嘅龍蝦。

3 天然大窗睇Kalbarri國家公園

如果鍾意睇奇岩怪石，卡爾巴里國家公園（Kalbarri National Park）肯定滿足到大家，由Geraldton開車都只係一個鐘。呢度唔單止睇到環迴360°大峽谷全景，仲可以欣賞有400萬年歷史嘅岩層！而最高人氣打卡影相熱點，一定非自然之窗（Nature’s Window）莫屬。顧名思義，佢就係一個由天然風化而成嘅「大窗」，由一層層岩層形成，從中間「窗口」望出去就係雄偉嘅峽谷山河，構圖壯麗！

睇完自然之窗，不妨行埋布爾達木道（Bigurda Trail），因為呢條步道可以睇到公園西岸嘅Coast Cliffs。沿住呢條海岸線慢行，沿岸集中咗多種奇石，旁邊亦會有峭壁懸崖，步道有多條路段，分1星至5星程度，行咩星就視乎自己能力同體力，校啱時間仲可以睇埋日落！

Kalbarri國家公園必睇景點：Island Rock，行呢條步道都可以睇到！

Bigurda Trail有好多路段，當中1星程度相當易行，風景又靚，全程非常舒服。

成條步道包含咗1星至5星路段，揀路線之前，一定視乎自己能力同體力。 — 成條步道包含咗1星至5星路段，揀路線之前，一定要視乎自己能力同體力。

Kalbarri National Park

位置：Kalbarri Road, Kalbarri WA 6536
收費：私家車澳元$12，最多可一行12人入場
開放時間：9:30am – 4:30pm
網址：parks.dpaw.wa.gov.au/park/kalbarri

4 Pinnacles怪石陣沙漠之旅

真係估唔到西澳都有沙漠，而且仲係由成千上萬石柱組成嘅怪石陣！講嘅就係尖峰石陣沙漠（Pinnacles Desert），由珀斯開車上Geraldton，中途就會經過。或者可以參加一日local tour，體驗一下又得。

石陣最大特色係大部分石柱都有鋒利嘅尖頂，比較高嘅石柱尖塔有3.5米高，其餘一般高度同人差不多，一個個人穿插其中畫面好得意。遠觀黃沙荒漠中嘅尖峰石，氣勢十足。如果細心留意，部分尖塔上仲有個蘑菇形缺口，原來係被鈣質結礫岩封蓋的殘留物。唔講唔知，呢啲石柱會一年比一年矮，想去睇呢個奇景真係要把握時間！

Nambung National Park

位置：Nambung National Park, WA 6521
收費：私家車澳元$12，最多可一行12人入場
開放時間：9:30am – 4:30pm
網址：parks.dpaw.wa.gov.au/park/nambung

5 歎新鮮即燒龍蝦

西澳Coral Coast地區盛產龍蝦，而且仲係全野生，夠晒鮮味彈牙，嚟到點可以唔擦餐勁！尖峰石陣沙漠附近，就有一個好出名嘅Lobster Shack龍蝦工場，參觀工場運作之餘，仲可以食龍蝦餐！如果參加尖峰石陣沙漠一天團，個團仲會包埋去！由珀斯開車去Geraldton，呢度亦係必經之路，去Lobster Shack食個lunch都唔錯。