【自助餐放蛇起底組】MK日式放題 3小時有鐵板燒食
刺身2分鐘上枱 蝦肉超霉一食即吐
呢間放題其實分咗好多個入座時段，3小時任食放題要由5:30入座，食到8:30，閒日最平都喺$228，價錢同坊間差唔多！一入座，店員已經通知我哋今日無吞拿魚，飲品、甜品可以出去自助區自己拎。
落單同平時放題一樣都係剔紙仔，一共有兩本落單簿仔，一本喺寫刺身、壽司同卷物，另一本落鐵板燒、炸物等。落單嗰陣，店員已經話佢哋上菜會好快手，所以可以邊落邊等。果然落咗單後，大約兩分鐘刺身就已經上枱！真心勁快手，而且執啱數，抵讚。
不過呢，除咗三文魚厚切又新鮮外，其他味道就認真……超麻麻！將本身已經唔係厚的帶子開邊，薄到無晒口感；章紅魚刺身口感似香口膠，咬極都唔斷；甜蝦同赤蝦食落只有微微蝦味，而且肉質完全唔ok，越食越霉，吞都吞唔落，即刻吐返出嚟。
呢度除咗正常壽司外，仲有好多好有創意嘅mix & match壽司，例如有黑松露牡丹蝦同泰式生蝦壽司，好新奇！黑松露牡丹蝦一食落超濃黑松露味爆出嚟，蝦肉正常，而且壽司飯夠細，食幾應該都唔會太飽肚。另外泰式生蝦太有趣了，味道同真嘅泰式生蝦一樣，隻蝦唔霉，可以一試。
另外仲有一啲創作壽司，都係將啲魚類、海鮮類嘅食材mix & match，御壽司喺芒果＋甜蝦＋蟹籽，一食落口有好清新嘅芒果味，但芒果味過後就食到霉蝦味……軟殼蟹手卷睇圖覺得軟殼蟹爆出嚟，好興奮忍唔住即刻叫一個試下，點知現實總是殘酷的……軟殼蟹短到…….得個半截腳仔……食落好香脆……但應該要叫十份先滿足囉。
炸物鍋物出色 鐵板燒凍冰冰
放題唔少得嘅炸物，唔錯唔錯，全部熱辣辣，芝麻雞翼超香口，好食！自家製吉列炸蠔都得過，一入口蠔汁即標出嚟，估佢唔到！紫心香芋球有啲淡味，但都炸得脆卜卜，過關啦！但最驚喜都喺個榴槤炸彈，榴槤餡超飽滿，一咬即刻感受到嗰種臭味！好正！
另外鍋物都正正常常，最估唔到呢度有雞煲食！雞件都幾大件，唔韌，入口少少辣，但麻度十足，可以一試。
最期待嘅鐵板燒！但一上枱，點解咁頹嘅 🙁 賣相好求其，唔係好吸引，鐵板大蝦隻蝦無出事，但可以再彈牙啲，但個汁有啲好怪嘅酸味，令人無意欲再食第二隻！鐵板醬汁魷魚筒照舊都係頹，唔講都知喺鐵板出爐……食落都唔熱嘅，好似放咗好耐先上枱咁，就算彈牙又有咩用喎！鹽燒牛舌等咗半個鐘先到，同埋我Order 2 份，嚟得1份，食落牛舌好軟腍，好食，但唔想再等多半鐘！
自助甜品櫃加分 1人1盒Mövenpick
甜品區係自助形式，有粟米羹、花生糊熱食，仲有朱古力噴泉同泡芙任拎，仲有少少冷盤，有凍蝦、菜同生果等。另一邊仲有兩大個甜品櫃，可以細細件mousse cake同點心等。
總結：甜品區+Mövenpick雪糕好吸引，炸物跟鍋物不錯，但刺身同鐵板燒味道麻麻，真係有待改善，要扣分！雖然有半個鐘頭都係等嘢食到，但勝在有甜品自助區域，唔介意可以出去拎甜品醫下肚先囉。但服務都唔錯嘅，幾乎一舉單就俾店員搶走咗，好快手，環境都好多卡座，夠闊落，而且平時日式放題食兩個鐘都同呢度差唔多價錢，呢度可以坐3粒鐘，啱晒慢慢食嘅朋友！
總分：7/10
御滿屋日本料理
地址: 旺角彌敦道655號1樓全層 (顯示地圖)
電話：3622 3336/3622 3338
$228晚市放題供應時間:
星期一至三:5:30pm-8:30pm
收費: 成人:$228，小童:$148
備註:收加一
延伸閱讀：
