【自助餐放蛇臥底組】$200有找 韓菜料理 放題
訂了枱也要等到2046
打電話訂枱時店員表示即使來到也要等，但沒想過仍然要再等多一小時（請問訂枱的意義何在？），餐廳的時間管理要盡快改善。細心的經理知道顧客等了很久，會提供冰凍嘢飲。
刺身望落新鮮 食落無味
除了點了的刺身外，餐廳會額外送每位客人一隻手咁長嘅鮮蝦刺身。刺身數量也來得很足，賣相也很吸引，望落肥美又新鮮。食落口感不錯幾juicy，溫度適中，不過就無味，有點失望。
壽司的名字幾有創意，如：黑蚊蚊、笑蝦蝦、碎濕濕。賣相不俗，絕對不像其他 放題 般求其將舊飯堆埋一齊咁。不過，夾起壽司時發現其實件壽司都幾散。
食 放題 竟然有人蔘雞湯？！仲唔即刻挑戰下？嗰碗湯，啊唔係，個湯碗好大，但湯就唔係好多，只係一人份，如果想食就要一人叫一碗。足唔足料呢？記者見到有幾條人蔘鬚鬚（應該係），同雞皮一塊。可能廚師以為我唔鍾意食湯渣，所以足唔足料就見仁見智。味道方面就一般般啦，普通雞湯味，無人蔘味的。
牛肉粉絲辣湯內有很多牛肉，而且口感鮮嫩不黐牙。湯的味道像羅宋湯，又夠曬熱，不是很辣。呢個可以添食！
醬油蝦的賣相有點似泰國的生蝦刺身，蝦的味道被大蒜和醬油蓋過，完全食不到蝦味，而且醬油很鹹，疑似中伏！
韓國料理又點少得年糕呢？呢到用卡邦尼醬炒年糕，味道幾香幾creamy，之但係我係叫年糕喎，唔係腸粉，個年糕腍到似腸粉，口感很差，中大伏！
炸物不是用了很多炸粉，而且熱辣辣，抵讚！但係個炸蝦天婦羅冇咩蝦味喎。
呢到有得燒肉同海鮮，有肥牛、牛舌、一口牛粒、羊架、五花腩、帆立貝、生蠔乜乜乜。雖然刺身同料理用嘅海鮮無咩味，但係燒烤用的海鮮卻是另一回事。帆立貝同生蠔絕對是回本首選！夠大隻又鮮味，要追加再追加！唯一不好的是蒜香粉絲烤生蠔沒有粉絲（疑似違反商品説明條例喎）。醉翁之意不在酒，精明的你又點會因為冇粉絲而嬲呢？
另外，要有心理準備呢到通風系統麻麻，勁大煙，攻到記者標曬眼水，食完成身燒肉味。
除了雀巢雪糕同雪米糍任食外，餐廳都有自創甜品。甜品的設計是時尚簡約風，均是以白色為主色，中間配以一點（只是一點）朱古力醬作裝飾。貼士：都係主攻雀巢雪糕同雪米糍吧！
總分：6／10
伏，係無處不在，但燒肉同燒海鮮都不錯，可以回本，建議你把胃口留給燒烤。刺身、壽司同韓日料理的味道有很大的改善空間。但呢個價錢，都算係咁啦！
韓日屋
地址: 旺角兆萬中心15樓（顯示地圖）
供應時段: 5pm –1:00am
訂座電話: 2989 9433
收費:
成人 $139–$169 小童(1米－1.4米) $99 (星期日至四)
*成人加$30，小童加$10 可享刺身任食
星期五、六、公眾假期及前夕每位加$10
延伸閱讀：
【自助餐放蛇起底組】 $300酒店Buffet即開 生蠔 ！中伏無？
