美食車牌照申請5大重點懶人包! 到底有幾難申請先?
1. 美食車牌照 申請資格
呢個計劃表明係18歲或以上嘅香港居民或者香港註冊公司或無逗留條件限制先可以申請得，外國經營者想申請就需要同本地公司合作至得，呢個計劃似係「香港人限定」喎！
2. 美食車牌照 評審兩大關！
第一關：評審美食計劃書
「美食計劃書」需要有齊哂美食車主題、菜單、財務計劃、車輪設計等內容。
佔分比重（100分為滿分）
菜色設計概念：40分
美食車外觀設計及環境管理：25分
財務及業務計劃可行性：25分
初創及微型企業優勢（即初創業者）：10分
第二關：烹飪挑戰賽
淨係計劃書都唔夠，仲要即場進行烹飪比賽，而評審就話會來自政府部門、美食車營運地點負責人同各個飲食界＋旅遊業界代表，但實質係邊個就未定，唔少網民都提議，不如搵返家燕媽媽做算啦……
佔分比重（100分為滿分）
食物味道：35分
烹調技巧及安全：35分
菜單：10分
食物概念：10分
「美食車先導計劃」嘅參加者需要通過兩大關卡嘅挑戰先可以成功獲牌，而蘇局長就話呢個計劃係考創意、考特色，唔怪得網民們都大嘆如果要喺美食車賣魚旦嘅機會幾乎等於零，除非……參加者整到「黯然銷魂咖哩魚蛋」感動評審啦……
記者就模擬咗個主題為黑松露嘅美食車餐牌啦，唔知咁樣玩法又夠唔夠創新，入唔入到圍呢？係未淨係睇都好想食呢？（其實記者都係偷返香港小店們嘅特色小食好橋…）
設計菜單: 黑松露雞旦仔 +黑松露海膽芝士漢堡 +黑松露釀蝦球 +黑松露朱古力餅
3. 美食車停泊地點
入圍嘅16架美食車將喺以下8個指定地點輪流營運，每個地點將提供2個指定泊車位。睇真啲，全部都係旅客集中地……睇嚟美食車嘅目標，並唔係我哋……
・灣仔金紫荊廣場
・中環海濱活動空間
・ 海洋公園的園外位置
・尖沙咀梳士巴利公園
・尖沙咀藝術廣場
・起動九龍東一號場
・黃大仙祠旁的黃大仙廣場
・香港迪士尼樂園的園外位置
4. 申請牌照要有60萬最低門檻？
政府話呢個計劃係無預設嘅入場費門檻，而坊間經常流傳嘅最低入場費60萬，只係綜合市場反映營運一輪美食車嘅成本。60萬呢個數只係申請者如果買一架全新輕型貨車＋設備齊全食物配製間＋處理營運產生廢水廢迷物裝備嘅大約估價。而實質成本就要睇吓營運者所購入嘅車輪同裝備，即係如果你買部二手車咪有可能平啲囉！
5. 唔夠錢又想參加點算？
唔夠資本嘅，可以申請香港按揭證券有限公司嘅小型貸款計劃，最高貸款金額為30萬港元，還款期最長可為5年。
延伸閱讀：
