俄航強推新制服：大碼空姐要扣人工！空服人員透露 8大航空界體形秘密
俄航轉新制服 著唔落就扣人工
據BBC報道，去年俄羅斯航空公司（Aeroflot）開始停止供應大碼制服給空服人員，並指出如果有空服人員不能穿上統一大小的制服，就要扣減人工。
俄航：空姐的成功取決於身形
俄羅斯航空藉口要為全線空姐換新制服，要求所有空姐量度三圍及體重，並要求所有超標的空中服務員只能飛國內線，強調：「空姐的成功，取決於她們的身形！」身形較胖或年老的空姐，因而減少飛行機會，失去花紅。
空姐控告航空公司
面對不公平的對待，其中兩位受害的空服人員Evgenia及Irina決定控告俄羅斯航空，俄航以「身形較大的空姐需要更多燃料」為抗辯理由，同時指出太肥的空姐有機會堵塞緊急出口，但最終兩位空姐勝訴！
俄航堅持 改制不存在歧視成分
雖然俄航最終敗訴，但表示對裁判滿意結果，並強調航空公司不會就性別、年齡、種族歧視任何成員，之後或者會再考慮上訴，但對於受害空姐來說，這次判決畀咗好大鼓勵佢哋。
網友反應兩極：
面對是次事件，網友有不同的反應，部分網友指出，俄航「身形較大的空姐需要更多燃料」的說法只是藉口，實際上是只想要外貌看起來漂亮的空服人員，而體形大都可以好健康，工作能力同樣都可以好優秀，不應以貌取人！
但有不少網友都同意空姐肥胖的話，會浪費更多燃料，同時更指出肥人都是因為生活不健康而造成，公司無必要承擔他們不節制的後果，呢種留言都有好多人like！
機師同意 愈肥需要的燃料愈多
就俄航「身形較大的空姐需要更多燃料」的說法，記者訪問了機師Blogger Mr. Pilot ，他同意該說法，表示：「嚴格上來講佢冇講錯 ，飛機愈重，所需嘅燃料愈多。」但Mr. Pilot 亦補充：「正常我哋用 standard weight，assume 所有機組人員嘅體重同手提行李加埋係 80kg，香港嘅空姐咁窈窕，一定唔會爆秤！」
現役空姐評論 事件帶有歧視成分
記者就事件詢問香港現職空姐意見，「空姐發夢日記」認為事件「好唔公平」，帶有歧視成分「因為每個人嘅體重同身形都會隨著唔同情況改變。有時唔一定係對方食得多，更有機會係佢可能病咗或者生育後而增加體重。佢請一個空姐唔係淨係睇外表，而最緊要係對方嘅工作能力同經驗，所以呢個規限係絕對有歧視成分。」
另一位空姐Blogger 「神奇女俠大戰自由女神 」則表示，人工同身形掛鈎係好唔「make sense」：「點解人工同size要掛鈎？而家又唔係你fit size 就令客人更滿意，所以我覺得成件事唔合理！」
同類事件時有發生
雖然俄航的個案似乎好極端，但事實上唔少航空公司，都曾針對空服人員的身形、體重、年紀，大搞小動作，又或者有各種奇怪要求。部分航空公司的制服更加是以暴露、性感而聞名，無疑是對空服人員有好大的限制。
個案一：馬航解僱肥胖空服人員
2016年起，馬航落實了「體重管理計劃」，要求所有空服人員定期測量體重，空姐BMI為22-25，空少則是25-28。如果超標，就要在七日內作合理解釋，並轉為地勤。結果最近就以超重為理由，裁退5名資深的空服人員。
個案二：新航奇怪要求 腳趾要乾淨！
喺咁多間航空公司當中，新航的要求最特別，要空姐腳趾乾淨！好多喺新航做的空姐，都會叮嚀面試的人會留意腳趾，原因在於其中一個面試流程，就係要試穿新航制服的拖鞋，露出乾淨的腳趾甲先可以畀到考官好印象。
個案三：國泰計劃延長退休年齡 網友毒舌回應
香港雖然甚少出現類似個案，但近日國泰計劃延長退休年齡，因此向空姐空少發出問卷，以一人一票的形式，決定空服人員的退休年齡。
消息一出，立即引起大量網友瘋狂討論！
空姐分享：航空界體重控制
記者訪問了幾位現役空姐，詢問香港航空界的真實情況。
#1. 生完都唔可以肥！
現役空姐爆料，有航空公司規定空姐生育完後，要成功著番同一個size 的制服﹐先可以飛番！空姐要生仔，壓力真係好大！
#2.換size 就要見經理
如果真係不幸食多咗或肥咗，要換大啲嘅碼，有航空公司就要求空姐去見負責睇Grooming嘅經理，了解下情況。「但係因為咁樣而限制佢嘅更表就未聽過，始終公司怕觸犯歧視條例啩。」
#3. 面試時身形影響印象分
現役空姐透露，應徵的時候雖然沒有明文規定對身高、體形的要求，但考官在評核的時候，會留意學員的身形，同樣是印象分的一種，因此也有影響。
#4. 香港不常見年輕肥空姐
記者詢問了多位現役空姐，都一致表示做了多年，在香港真的不常見肥的年輕空姐，相信是面試的時候已篩走了一批人。「香港同亞洲地區都係，審美觀都係瘦啲先叫靚，所以本身瘦嘅女仔比較多。」
#5. 會有心理壓力要控制體重
雖然香港不曾發生有空服人員因體重被裁的消息，但唔少空姐也表示自己都會有怕肥的壓力。兼職空姐姥姥表示「通常你著開同一個碼嘅，如果肥咗好容易察覺得到，當肥到著唔落就要去制服部門轉size，有少少麻煩，所以通常唔會被自己肥」；而「空中小小姐」都表示，香港空姐個個身材都好fit，自己拍埋去如果肥咗，真係會唔開心！
#6. 外籍空服人員相對多年長及較肥
相比起香港的空服人員，不少空姐都表示外籍中很多都不算瘦，而且也較為年長，因此到一定年紀後，會考慮轉其他亞洲以外的航空公司。
#7. 時常發生客人取笑事件
雖然空服人員的職責只是服務客人，但唔少客人都對空姐/空少「好有要求」，唔少空姐都分享，曾聽到客人話「點解咁肥都可以做到空姐」，真係聽到都傷心！
#8. 年紀大會轉做文職
雖然空姐一般的退休年齡都是在55-60歲，但在香港，很少在航班上會看見年長的空服人員，空姐Blogger解釋，一來是因為年紀大職級通常也較高，一個航班最多只會需要一位高級空姐。另一個原因，則是好多空姐有一定年紀後，都會轉做文職或訓練新空姐的工作。
